თავისუფალი დრო

„სურვილების ხე“ და აკინძული ნატვრები

ახალი წელი ის დღესასწაულია, რომელსაც მხოლოდ პოზიტივი შეაქვს ადამიანთა ცხოვრებაში. ეს ის დროა, როცა საკუთარ სურვილებსა და საახალწლო ჩანაფიქრებს ხმამაღლა ვამბობთ, როცა გეგმებს ვსახავთ, მიზნებს ვაკონკრეტებთ, ერთმანეთს იმედებსა და სურვილებს ვუზიარებთ. მართალია, ოცნებების დიდი ნაწილი, მეტისმეტად პოზიტიური განწყობის გამო, უტოპიურია, მაგრამ მომავალზე ფიქრი და წინასაახალწლო სურვილები მაინც დადებით მოვლენად მიგვაჩნია. ეს ერთიორად ზრდის დასახული მიზნის მიღწევის შანსს. 
რა სურვილები ამოძრავებთ უნივერსიტეტის პროფესორებსა და სტუდენტებს, რაზე ოცნებობენ და რის ახდენას ისურვებდნენ 2018 წელს – ამის თაობაზე, ალბათ, ინფორმაცია უნდა ჰქონდეს ხელმძღვანელობას! – ვინ იცის – იქნებ სწორედ მათ შეძლონ „სურვილების ხეზე“ აკინძული ნატვრების ასრულება...

 

ჩემთვის და ჩემი კოლეგებისთვის ვისურვებდი სახელფასო ანაზღაურების ზრდას

ვასილ კაჭარავა, თსუ-ის ჰუმანიტარულ მეცნიერებათა ფაკულტეტის ამერიკის შესწავლის ინსტიტუტის დირექტორი, პროფესორი:

– ჩემი სურვილია, უნივერსიტეტმა 100 წლის იუბილე ღირსეულად აღნიშნოს. ამას დიდი მნიშვნელობა აქვს არა მარტო უნივერსიტეტელებისთვის, არამედ მთელი ქართული საზოგადოებისთვის. ეს უნივერსიტეტის ცნობადობისთვის კიდევ ერთი კარგი საშუალებაა, როგორც საქართველოს, ასევე მსოფლიოს მასშტაბით. არ დაგვავიწყდეს, რომ თბილისის სახელმწიფო უნივერსიტეტის „თეთრი ტაძარი“ იყო ის ძირითადი ორგანიზაცია, რომელმაც საბჭოთა პერიოდში საქართველოს სულიერება და კულტურა გადაარჩინა. ვისურვებდი, რომ ჩვენმა უნივერსიტეტმა კვლავ დაიბრუნოს ქართული კულტურული სულიერების ავანგარდის ადგილი. 
უნდა გაიზარდოს ქართული პროფესურის პრესტიჟი და მნიშვნელობა საზოგადოებაში. მიმაჩნია, რომ ქართული საზოგადოება და ქვეყნის მთავრობა არ იყენებს საკმარისად იმ პოტენციალს, რომელიც სახელმწიფო უნივერსიტეტს გააჩნია და ამით ძალიან ბევრს კარგავს. ის, რომ ჩვენს უნივერსიტეტში არსებული ინტელექტუალური და სამეცნიერო პოტენციალი სათანადოდ არ არის გამოყენებული, აფერხებს ქვეყნის განვითარებას. აუცილებელია, უნივერსიტეტის ხელმძღვანელობამ იზრუნოს, რათა ქართული პროფესურის ადგილი საზოგადოებაში კიდევ უფრო გამოიკვეთოს, უფრო ღირსეული და პრესტიჟული გახდეს. 
ჩემთვის და ჩემი კოლეგებისთვის კი ვისურვებდი სახელფასო ანაზღაურების ზრდას, რომელიც არასდროს იყო მაღალი და, დღევანდელი ინფლაციის პირობებში, საკმაოდ მცირეა. თუ გვინდა, რომ ღირსეულად ვიმუშაოთ, მაპატიეთ და, პურის ფულზე და დამატებით სამუშაო ადგილებზე არ უნდა ვფიქრობდეთ, ორიენტირებული უნდა ვიყოთ მხოლოდ ჩვენს უნივერსიტეტზე და სწავლების ხარისხის გაუმჯობესებაზე. მეცნიერება ისეთი რამ არის, რომ პროფესორი მეცნიერებაზე უნდა ფიქრობდეს, იკვლევდეს, ეძიებდეს... კარგი პროფესორი სამეცნიერო საქმიანობის გარეშე ვერ იქნები. პირველ რიგში, სამეცნიერო სფეროში უნდა ვიმუშაოთ, სამეცნიერო პროდუქტი შევქმნათ. აქ უნდა ხდებოდეს ჩვენი ინტელექტუალური შესაძლებლობების ზრდა და განვითარება. მხოლოდ ამის შემდეგ, აკუმულირებული ცოდნის მეშვეობით, შეიძლება ვიმუშაოთ სტუდენტებთან... უნივერსიტეტის წარმატებულ სტუდენტს წარმატებული პროფესურა ზრდის. 
ასევე, სასურველია მეტად შეეწყოს ხელი პროფესურის კვალიფიკაციის ამაღლებას, მათი მივლინებების დაფინანსებას უცხოეთის უნივერსიტეტებსა და სამეცნიერო-კვლევით ცენტრებში. ასევე უნდა ვიზრუნოთ სტუდენტების სასწავლო პრაქტიკებსა და სტაჟირებებზე. ეს კომპონენტი ძალიან მნიშვნელოვანია საზღვარგარეთის წარმატებულ უნივერსიტეტებში. დღეს მსოფლიოს მრავალი უნივერსიტეტი სტუდენტებს საზაფხულო სასწავლო პრაქტიკებზე უშვებს ევროპის სხვადასხვა ქვეყანაში. ეს აუცილებელია სტუდენტის კულტურული ზრდისთვის. თუ ლუვრი და პრადო არ გაქვს ნანახი, მარტო თეორიული სწავლება საკმარისი არ არის და განათლება ვერ იქნება სრულფასოვანი. მართალია, სასწავლო სტაჟირებები და პრაქტიკები არის ჩვენს უნივერსიტეტში, მაგრამ კიდევ უფრო გაფართოება სჭირდება.
მინდა, თსუ-ის წიგნების მაღაზიის მუშაობის პრინციპი გამოსწორდეს. ის, პირველ რიგში, სტუდენტების მოთხოვნებს უნდა აკმაყოფილებდეს, აქ უნდა მოიძიონ მათ სასწავლო ლიტერატურა. ჩვენი წიგნების მაღაზია კი სრულიად სხვა პრინციპით მუშაობს – ყიდის მხოლოდ იმ წიგნებს, რომელსაც თსუ-ის გამომცემლობა ბეჭდავს. სტუდენტს უნდა შეეძლოს ადგილზე შეიძინოს სახელმძღვანელო, რომ დრო არ დაკარგოს წიგნის მაღაზიებში სარბენად. ვფიქრობ, ამის ორგანიზება ძნელი არ უნდა იყოს. 
კარგი იქნება, თუ უნივერსიტეტში გაიხსნება ე.წ. Fაცულტყ ჩლუბ ანუ პროფესურის თავშეყრის ადგილი. თუნდაც პატარა, კოხტა და მყუდრო კაფე, სადაც პროფესორები ერთმანეთს შევხვდებით, ვისაუბრებთ, დავეკონტაქტებით უცხოელ კოლეგებს, ანუ როგორც ეს მსოფლიოს მრავალ უნივერსიტეტში ხდება. სწორედ ასეთ შეხვედრებზეა სამეცნიერო საუბრები, აზრთა გაზიარება, იდეების „დუღილი“. ისეთი გარემო უნდა შევქმნათ, რომ ყველა პროფესორს უხაროდეს მოსვლა და კოლეგებთან გასაუბრება.
დღეს უნივერსიტეტში ბევრი სასიკეთო რამ კეთდება, ჩვენი უნივერსიტეტის ადმინისტრაცია მოწოდებულია უნივერსიტეტის გაძლიერებისა და განვითარებისკენ. ინფრასტრუქტურის მხრივაც სასიკეთო ძვრებია, ამას ვხედავთ და ვაფასებთ. იდეალური მდგომარეობა არც სტენფორდის უნივერსიტეტშია! 
გისურვებთ ყველას წარმატებებს და გაძლიერებულ, გამთლიანებულ ქვეყანაში ცხოვრებას!


ვისურვებდი, რომ საქართველოს ეკლესიამ ივანე ჯავახიშვილი წმინდანად შერაცხოს

ბესარიონ ზოიძე, თსუ-ის იურიდიული ფაკულტეტის პროფესორი:

– ვისურვებ, რომ ივანე ჯავახიშვილის სახელობის თბილისის სახელმწიფო უნივერსიტეტმა თავისი ისტორიული მისია კვლავაც შეასრულოს. თბილისის სახელმწიფო უნივერსიტეტი ყველა სხვა უმაღლესი სასწავლებლებისთვის მისაბაძია და ეს ტრადიცია უნდა გააგრძელოს, იყოს სანიმუშო განათლების ევროპეიზაციის პროცესის განხორციელებაში. 
ივანე ჯავახიშვილი, ფაქტობრივად, ქართული საზოგადოებისათვის და მეცნიერებისთვის წარმოადგენს ინტელექტუალურ წმინდანს. ამიტომ, ვისურვებდი, რომ საქართველოს ეკლესიამ იგი ოფიციალურად წმინდანად შერაცხოს.


ვისურვებდი ისეთი სასაუბრო კლუბის შექმნას, სადაც ყველა საფეხურის სტუდენტს გამოცდილების ურთიერთგაცვლა შეეძლება

ნანა შათაშვილი, თსუ-ის ზუსტ და საბუნებისმეტყველო მეცნიერებათა ფაკულტეტის პროფესორი:

– ვისურვებდი, რომ 2018 წლიდან თბილისის სახელმწიფო უნივერსიტეტში რამდენიმე პრობლემა მოგვარდეს. ადმინისტრაციამ სტუდენტს უნდა დაანახოს, რომ პროფესორს, რომელსაც ირჩევს კონკურსით, ენდობა და მოფრთხილება სჭირდება. ვფიქრობ, ასეთ შემთხვევაში სტუდენტებში პასუხისმგებლობის გრძნობა მოიმატებს და ლექციებს ინტენსიურად დაესწრებიან, რაც დღეს ასე არ ხდება – ისინი დარწმუნებულები არიან, რომც არ ისწავლონ, მაინც არანაირი პრობლემა არ შეექმნებათ, რადგან უნივერსიტეტში დაფინანსება მოაქვთ. თუმცა პრობლემა ექმნება პროფესორის კვალიფიციურ მუშაობას და შედეგად მისი უნივერსიტეტში დარჩენა კითხვის ნიშნის ქვეშ შეიძლება დადგეს. 
პროფესორს დიდი სამუშაო აქვს, როგორც პედაგოგსა და მეცნიერს, ამიტომ დამატებით დროს არ უნდა ხარჯავდეს ისეთი საკითხების მოგვარებაში, როგორიც არის, მაგალითად, ინფრასტრუქტურის გაუმართაობა (ლაპარაკია ჩვენი ფაკულტეტის კორპუსებზე). ხშირად აუდიტორიაში დაფა არ არის, წყალი არ მოდის, გათბობა არ არის, საპირფარეშო მოუწესრიგებელია და ასე შემდეგ. ჩვენ, პროფესორებს, წაყენებული გვაქვს საერთაშორისო სტანდარტების მოთხოვნები, თუმცა სამეცნიერო მუშაობის პირობები და სწავლების ფორმატიც საერთაშორისო სტანდარტებს არ შეესაბამება. მაგალითად, სტუდენტებისათვის, განსაკუთრებით მაგისტრანტებისა და დოქტორანტებისათვის არაა გამოყოფილი სამუშაო სივრცე, სადაც მათ შეეძლებოდათ კვლევითი სამუშაოს ერთად ჩატარება, გამოცდილებისა და ცოდნის გაზიარება. ვისურვებდი ისეთი სასაუბრო კლუბის შექმნას, სადაც ყველა საფეხურის სტუდენტს გამოცდილების ურთიერთგაცვლა შეეძლება.


ვისურვებდი, რომ უნივერსიტეტს მომავალ წელს ბევრად გაეუმჯობესებინოს თავისი შესაძლებლობები

ზურაბ დავითაშვილი, თსუ-ის სოციალურ და პოლიტიკურ მეცნიერებათა ფაკულტეტის პროფესორი:

– უნივერსიტეტში არის ფინანსური, მატერიალურ-ტექნიკური ბაზის პრობლემები, შესაბამისად, ვისურვებდი, რომ უნივერსიტეტს მომავალ წელს ბევრად გაეუმჯობესებინოს თავისი შესაძლებლობები. ასევე ვისურვებდი, რომ უფრო ინტენსიური გახდეს კავშირები საზღვარგარეთის წამყვან უნივერსიტეტებთან როგორც სტუდენტებისთვის, ისე აკადემიური პერსონალისთვის. 2018 წელს თბილისის სახელმწიფო უნივერსიტეტს დაარსებიდან 100 წელი უსრულდება, ეს საიუბილეო თარიღია და მინდა, რომ ბედნიერი წელი იყოს პირველი ქართული უნივერსიტეტისთვის. ის ჩვეულებრივი უმაღლესი სასწავლებელი არ არის და გაცილებით ბევრს ნიშნავს, ვიდრე რომელიმე სხვა უნივერსიტეტი.


ვისურვებდი, რომ აკადემიური კონკურსები წარმატებით და ობიექტურად ჩატარდეს

ავთანდილ სილაგაძე, თსუ-ის ეკონომიკის მეცნიერებათა დოქტორი, პროფესორი:

– უნივერსიტეტს ვუსურვებ უფრო დიდ წარმატებებს როგორც სასწავლო, ასევე სამეცნიერო კუთხით. ის სანიმუშო უნივერსიტეტია კავკასიის რეგიონში, მაგრამ კიდევ ბევრია გასაკეთებელი მისი პრესტიჟისა და პოპულარიზაციის ასამაღლებლად. ეს ყველაფერი გაკეთდება იმ მეცნიერთა მონაწილეობით, რომლებიც ღირსეულად იქნებიან წარმოჩენილნი უნივერსიტეტში. მომავალ წელს თსუ 100 წლის ხდება. მინდა, მთელ ქართულ საზოგადოებას მივულოცო ეს საიუბილეო თარიღი.
2018 წელს გამოცხადდება კონკურსები აკადემიური თანამდებობების დასაკავებლად, ვისურვებდი, რომ ეს კონკურსები წარმატებით და ობიექტურად ჩატარდეს.

 

მინდა სტუდენტებს ჰქონდეთ ბევრი მოგზაურობის შესაძლებლობა

ხათუნა კაჭარავა, თსუ-ის სოციალურ და პოლიტიკურ მეცნიერებათა ფაკულტეტის პროფესორი:

– ჩემი სურვილები სტუდენტებს უკავშირდება, რადგან ძალიან მნიშვნელოვანია, რომ სტუდენტებმა პიროვნებებად იგრძნონ თავი უნივერსიტეტში, ჰქონდეთ კომფორტული გარემო არა მხოლოდ ინფრასტრუქტურის, არამედ ლექტორებთან ურთიერთობის თვალსაზრისითაც; ჰქონდეთ სწავლის მოტივაცია და რაც შეიძლება ბევრი მოგზაურობის შესაძლებლობა, რადგან, რასაც სწავლობენ, საკუთარი თვალითაც იხილონ. ამის საშუალება უკვე არსებობს და 2018 წელს თუ ამას განახორციელებენ, ძალიან კარგი იქნება“.

 

რა სურთ სტუდენტებს?

ვისურვებდი, რომ სახელმწიფომ დაფინანსება გაუზარდოს უნივერსიტეტსა და სამეცნიერო-კვლევით ინსტიტუტებს

დავით კვარაცხელია, თსუ-ის ჰუმანიტარულ მეცნიერებათა ფაკულტეტის სტუდენტი:

– ჩემი სურვილია, რომ სახელმწიფომ დაფინანსება გაუზარდოს თბილისის სახელმწიფო უნივერსიტეტს და სამეცნიერო-კვლევით ინსტიტუტებს. ამ ორგანიზაციებს უნდა ჰქონდეთ იმის რესურსი, რომ სამეცნიერო კვლევები შეუფერხებლად და სათანადოდ განახორციელონ. ეს, აგრეთვე, ხელს შეუწყობს სასწავლო სახელმძღვანელოების შექმნას, უცხოური სასწავლო ლიტერატურის თარგმნას და გამოცემას. ვისურვებ, რომ სტუდენტებისთვის გაიხსნას მყუდრო, კომფორტული და გემოვნებით მოწყობილი კაფეტერია, სადაც ლექციიდან ლექციამდე დასვენებას შევძლებთ.


მინდა, უნივერსიტეტში WiFi ყველასთვის ხელმისაწვდომი იყოს ყველა კორპუსში

თეონა ყიფშიძე, თსუ-ის ჰუმანიტარულ მეცნიერებათა ფაკულტეტის სტუდენტი:

– კარგი იქნება, თუ უნივერსიტეტის აუდიტორიები აღიჭურვება შესაბამისი სასწავლო ტექნიკით და ამით პროფესორს ექნება საშუალება, ლექცია უფრო შთამბეჭდავი და საინტერესო გახადოს. უნივერსიტეტში ინტერნეტი გამართულად უნდა მუშაობდეს, ჭიFი-ით სარგებლობა არ უნდა გვიჭირდეს და მინდა, მისი მოწოდება იყოს ხარისხიანი და ყველასთვის ხელმისაწვდომი.

 

მინდა, რეგისტრაციისას საგნებს უპრობლემოდ ვირჩევდეთ

ანა კვიციანი, თსუ-ის სოციალურ და პოლიტიკურ მეცნიერებათა ფაკულტეტის სტუდენტი:

– ვისურვებდი, სასწავლო წლის დაწყების დროს არ შეგვექმნას პრობლემები საგნების არჩევის კუთხით. როცა საგანს ვირჩევთ, ან დრო არ გვემთხვევა, ან ჯგუფებში ადგილი აღარ არის, ცხრილების მოწესრიგება ნამდვილად მეტ კომფორტს შეგვიქმნის სტუდენტებს. 
ახალ წელს მივულოცავ ჩვენს პროფესორ-მასწავლებლებს, წარმატებებს და ღირსეულ ცვლას ვუსურვებ.


ვისურვებ, უნივერსიტეტის ლაბორატორიები ინოვაციური ტექნიკური მოწყობილობებითა და ინვენტარით აღიჭურვოს

ირაკლი მაისურაძე, თსუ-ის ზუსტ და საბუნებისმეტყველო მეცნიერებათა ფაკულტეტის სტუდენტი:

– სურვილი მაქვს, უნივერსიტეტმა საქმიანობა ინოვაციების დანერგვის მიმართულებითაც გააძლიეროს. ინოვაციური მიდგომა უმაღლესი სკოლის სასწავლო პროცესში უაღრესად მნიშვნელოვანია და ის სწავლების ხარისხის ზრდას შეუწყობს ხელს. ვისურვებ, უნივერსიტეტის ლაბორატორიები ინოვაციური ტექნიკური მოწყობილობებითა და ინვენტარით აღიჭურვოს.


მინდა საკვები ობიექტი III კორპუსთანაც გაიხსნას

ნუკრი ბერიძე, თსუ-ის სიქოლოგიისა და განათლების მეცნიერებათა ფაკულტეტის II კურსის სტუდენტი:

– მინდა, ბევრი საჯარო ლექციები, პროექტები ფსიქოლოგიის თემატიკის მიმართულებით... 2018 წლიდან ვისურვებდი უფრო აქტიურ ცხოვრებას უნივერსიტეტში. ასევე, მინდა, საკვები ობიექტი III კორპუსთანაც გაიხსნას“.


რამდენიმე თვეზე გადანაწილებულ სწავლის გადახდის მექანიზმს ვისურვებდი

ანა ადამაშვილი, თსუ-ის სოციალურ და პოლიტიკურ მეცნიერებათა ფაკულტეტის I კურსის სტუდენტი:

– 2018 წლიდან ვისურვებდი უნივერსიტეტის ე.წ. მაღლივ და განივ კორპუსებში სველი წერტილების მოწესრიგებას; საგნის არჩევის გამარტივებულ სისტემას; უნივერსიტეტის აუდიტორიებში, განსაკუთრებით ნულოვან სართულებზე უკეთეს გათბობას... მიუხედავად იმისა, რომ მე 100%-იანი გრანტი მაქვს და ჩემთვის პრობლემა არ არის, სტუდენტებისთვის უფრო გამარტივებულ და რამდენიმე თვეზე გადანაწილებულ სწავლის გადახდის მექანიზმს ვისურვებდი. ასევე, მინდა, სტიპენდიები გაიცეს რეალური დამსახურების მიხედვით და არა უხარისხო კონფერენციების გათვალისწინებით.


ვისურვებდი გაცვლით პროგრამებს ჩემს ფაკულტეტზეც

გიორგი დუნდუა, თსუ-ის სიქოლოგიისა და განათლების მეცნიერებათა ფაკულტეტის მაგისტრატურის I კურსის სტუდენტი:

– გაცვლითი პროგრამები ფსიქოლოგიისა და განათლების მეცნიერებათა ფაკულტეტს არ აქვს და მინდა, 2018 წლიდან დაემატოს.


მინდა, III კორპუსის ეზოს კედლები ფსიქოლოგიის თემატიკის მიხედვით მოიხატოს

ერეკლე ჩერქეზიშვილი, თსუ-ის ფსიქოლოგიისა და განათლების მეცნიერებათა ფაკულტეტის III კურსის სტუდენტი:

– ვისურვებდი, რომ III კორპუსის ეზოს კედლები ფსიქოლოგიის თემატიკის მიხედვით მოიხატოს.


მინდა, უნივერსიტეტში დიდი საახალწლო კარნავალი ჩატარდეს

ნატა ღირსიაშვილი, თსუ-ის სოციალურ და პოლიტიკურ მეცნიერებათა ფაკულტეტის I სტუდენტი:

– საახალწლო მილოცვებს მეც ვუერთდები და ჩემს სურვილსაც გაგიმხელთ: მინდა, უნივერსიტეტში დიდი საახალწლო კარნავალი ჩატარდეს, სადაც ყველა ფაკულტეტის სტუდენტი და პროფესორ-მასწავლებელი მიიღებს მონაწილეობას. ჩემს თავს და თანაკურსელებს კი სწავლაში წარმატებას და მიზნების განხორციელებას ვუსურვებ.

 

ჩემი სურვილია, ყველა კორპუსი ლამაზად მოირთოს

ნინო ჭელიძე, თსუ-ის ზუსტ და საბუნებისმეტყველო მეცნიერებათა ფაკულტეტის სტუდენტი:

– ახალი წელი ჩემთვის ყველაზე საყვარელი დღესასწაულია. ამ დღეს ოჯახის წევრებთან და მეგობრებთან ერთად აღვნიშნავ. მინდა, საზეიმო განწყობა უნივერსიტეტშიც დამხვდეს. ჩემი სურვილია, ყველა კორპუსი ლამაზად მოირთოს. მინდა, ბევრ ბედნიერ სახეს ვხედავდე. ვულოცავ ჩემს მეგობრებს და ჩემს პედაგოგებს ამ დღესასწაულს საუკეთესო სურვილებით.


მინდა, უნივერსიტეტის ფოიეში სიმღერები ისმოდეს

თამთა სანიკიძე, თსუ-ის ჰუმანიტარულ მეცნიერებათა ფაკულტეტის სტუდენტი:

– ამ ახალ წელს მინდა, ყველა ჩემს ახლობელს ბედნიერება ვუსურვო, თანაკურსელებს კი – მიზნებისა და ოცნებების ასრულება. ჩემი სურვილია, ამ ახალ წელს, უნივერსიტეტში დიდი ნაძვის ხე დადგან, იმაზე დიდი, ვიდრე წინა წელს იყო, ფოიეში კი სიმღერები ისმოდეს“.


მინდა, საახალწლოდ, უნივერსიტეტმა ნაძვის ხის ზეიმზე მიუსაფარ და სოციალურად დაუცველ ბავშვებს უმასპინძლოს

ანუკა ფირცხალავა, თსუ-ის ჰუმანიტარულ მეცნიერებათა ფაკულტეტის სტუდენტი:

– მინდა, საახალწლოდ, უნივერსიტეტმა ნაძვის ხის ზეიმზე მიუსაფარ და სოციალურად დაუცველ ბავშვებს უმასპინძლოს. ჩვენ კი, სტუდენტებმა, ცოდნის ტაძარზე მოვუთხროთ, სიხარული და სითბო ვაჩუქოთ, საახალწლო საჩუქრები დავურიგოთ, ბავშვებში სწავლის სიყვარული გავაძლიეროთ, მეცნიერებისადმი ინტერესი გავუღვიძოთ და იმედი ვაჩუქოთ... დედა-უნივერსიტეტის კარი მათთვის ყოველთვის ღია და ხელმისაწვდომი უნდა იყოს.

მოამზადა თამარ დადიანმა, ნატო ობოლაძემ, შურთხია ბეროშვილმა

ვრცლად

ყველა დროისა და ყველა ქვეყნის ხელოვანი

„ყველა დროისა და ყველა ქვეყნის ხელოვანი“, – ასეა შეფასებული გერმანიაში გამოცემულ ენციკლოპედიაში ოთხ ქართველ მხატვართან ერთად საქართველოს დამსახურებული მხატვარ-მოქანდაკის გიორგი ჩალაძის შემოქმედება, რომლის ნახატები განსხვავებული სტილით და მანერით გამოირჩევა. თბილისის სახელმწიფო უნივერსიტეტში გამართული გამოფენა მხატვარმა შოთა რუსთაველის 850 წლისთავს მიუძღვნა და თავისი ფერწერული ნაწარმოებები წარმოადგინა. „სიბერე“, „როგორი იქნება XXI საუკუნე“, „სიცოცხლის წარმოშობა“, „შეხვედრა წარსულთან“, „შოთა რუსთაველი“, „რუსთაველი იერუსალიმში“, „ექვთიმე თაყაიშვილი“, „მარიამ ღვთისმშობელი“, „კონტრასტები“, „ვაჟა-ფშაველა“ და სხვა ფერწერული ტილოები, სპეციალისტების აზრით, ეროვნული ნიშნით არის „დაღდასმული“.

87 წლის რუსთაველ მხატვარს თსუ-ის მუზეუმის დირექტორი მაია გურაბანიძე მიესალმა: „გიორგი ჩალაძე გამორჩეული ხელოვანია, ამის დასტურია დღევანდელი გამოფენაც, სადაც წარმოდგენილია მცირედი ნაწილი იმ მდიდარი შემოქმედებითი მემკვიდრეობისა, რომელიც მხატვარმა თავისი მოღვაწეობის მანძილზე შექმნა. იგი პროფესიით მოქანდაკეა, მაგრამ, ამავე დროს, საინტერესო ფერმწერადაც გვევლინება. გიორგი ჩალაძის ნახატების თემატიკა ეროვნულია, მის პუანტელისტური ტექნიკით შესრულებულ ნახატებში გარკვეულწილად იგრძნობა ქართული შუა საუკუნეების მხატვრობის გავლენა, სწორედ ამ ტექნიკით აქვს შესრულებული ნახატები, რომლებშიც კარგად ჩანს ადამიანური სითბო და ნამდვილი ემოცია. ჩვენთვის დიდი პატივია მისი სტუმრობა თბილისის სახელმწიფო უნივერსიტეტში. სტუდენტებისთვის მნიშვნელოვანია – კარგად იცნობდნენ ასეთი ადამიანების შემოქმედებას“, – აღნიშნა მაია გურაბანიძემ.
გამოფენის გახსნაზე მხატვრის შემოქმედებაზე, მის დამსახურებასა და პედაგოგიურ მოღვაწეობაზე ისაუბრეს საქართველოს მხატვართა კავშირის თავმჯდომარემ ზურაბ ცერცვაძემ და რუსთავის მხატვართა კავშირის თავმჯდომარემ დავით ფიცხელაურმა.
გიორგი ჩალაძემ თბილისის სამხატვრო აკადემია 1957 წელს დაამთავრა. იმ დროდან იგი აქტიურად ჩაერთო შემოქმედებით საქმიანობაში, მონაწილეობდა საერთაშორისო თუ რესპუბლიკურ გამოფენებზე. აღსანიშნავია ასევე მისი მოღვაწეობა საბერძნეთში, სადაც მან არგონავტებისა და ალექსანდრე მაკედონელის თემაზე შექმნა ფერწერული პანოები, გააფორმა არა ერთი სპექტაკლი. იგი ფაზისის მეცნიერებათა ნამდვილი წევრი, მრავალი ჯილდოსა და სიგელის მფლობელია. გიორგი ჩალაძე – საქართველოს დამსახურებული მხატვარი, ღირსების ორდენის, იაკობ გოგებაშვილის მედლის, საქართველო-უკრაინის მეგობრობის მედლისა და სხვა ჯილდოების კავალერია. მის შემოქმედებას ეძღვნება მრავალი ხელოვნებათმცოდნეობის გამოცემა და კატალოგი როგორც საქართველოში, ისე საზღვარგარეთ. მის მიერ შექმნილი ქანდაკებები დგას საქართველოს, უკრაინისა და რუსეთის სხვადასხვა ქალაქში, ხოლო მისი ფერწერული ნამუშევრები სამხატვრო ფონდებში, მუზეუმებსა თუ კერძო კოლექციებში ინახება. გიორგი ჩალაძის დამსახურებად უნდა ჩაითვალოს რუსთავის სამხატვრო სკოლის დაარსება. ცნობილმა მოქანდაკემ ბედი ფერწერაში მოგვიანებით სცადა. სპეციალისტების შეფასებით, სწორედ ამ ფაქტმა განაპირობა, რომ მისი ნახატები განსხვავებული სტილით და მანერით გამოირჩევა. მათი აზრით, ქანდაკებისა და ფერწერის შერწყმა მთლიანობაში წარმოადგენს ფორმის, მოცულობისა და ფერის სინთეზს, რაც ორიგინალურობას სძენს მის ნახატებს.
გამოფენაზე გიორგი ჩალაძემ მადლობა გადაუხადა დამსწრე საზოგადოებას და სტუდენტებს თავისი მოსაზრებაც გაუზიარა: „მიხარია, რომ ჩემს ნახატებს თბილისის სახელმწიფო უნივერსიტეტში ახალგაზრდა თაობაც გაეცნობა. მინდა მათ ვურჩიო, რომ რა პროფესიაც უნდა აირჩიონ, ხელოვნების სიყვარული აუცილებლად შეინარჩუნონ და ამგვარად გაილამაზონ ცხოვრება“, – განაცხადა მხატვარმა.

ვრცლად

„ანამ დახურა ფანჯრები“ – სტუდენტების ექსპერიმენტი სცენაზე

„დარწმუნებული ხართ, რომ თქვენ ნამდვილად ისეთები ხართ, როგორადაც საკუთარი თავი წარმოგიდგენიათ? რა მოხდება, თუ ერთ დღესაც ამოუცნობ ადგილას მოხვდებით, სადაც ორი უცნაური ადამიანი გამოცდის წინაშე დაგაყენებთ. გადალახავს კი ასეთ გამოცდას ებრაელი გოგონა, ანა ფრანკი?“ – ეს კითხვებია დასმული ახალგაზრდა დრამატურგის ალექსანდრე ლორთქიფანიძის ერთმოქმედებიან პიესაში „ანამ დახურა ფანჯრები“, – რომელიც თბილისის სახელმწიფო უნივერსიტეტის სცენაზე თსუ-ის ჰუმანიტარულ მეცნიერებათა ფაკულტეტის კინო-ტელე-ხელოვნების მიმართულების სტუდენტებმა წარმოადგინეს. 
„13 წლის ებრაელი გოგონას ისტორია, რომელმაც მსოფლიო შეძრა, დღესაც რჩება იმის მაგალითად, თუ როგორ უნდა იბრძოლო თავისუფლებისათვის და როგორ შეიძლება შეინარჩუნო ღირსება... სწორედ ამიტომ, იგი დღესაც რჩება ახალგაზრდებისთვის საყვარელ და დაუვიწყარ პერსონაჟად. ამიტომ შემთხვევითი არ არის, რომ ჩვენი ექსპერიმენტის განსახორციელებლად სწორედ მისი პერსონაჟი შევარჩიეთ, რომელიც ამჯერად ახალგაზრდა დრამატურგმა გააცოცხლა თავის პიესაში“, – ამბობს სამსახიობო ხელოვნების საგნის პედაგოგი, რეჟისორი ნინო გელოვანი.
სპექტაკლის დადგმის იდეა ლექციების დროს დაიბადა, როდესაც პედაგოგმა გადაწყვიტა, რომ ლექციებზე მიღებული ცოდნა შესაძლებელი იყო სტუდენტებს პრაქტიკულადაც განეხორციელებინათ და მოსაწყენი კოლოკვიუმის მაგივრად თავიანთი სამსახიობო ხელოვნება გამოევლინათ. როგორც პედაგოგი და სტუდენტები ამბობენ, ეს ერთგვარი ექსპერიმენტი იყო, რომელიც დიდი შრომის და ძალისხმევის შედეგად წარმატებით განახორციელეს. გარდა ამისა, სპექტაკლის მუსიკალური და მხატვრული გაფორმებაც სტუდენტებმა ითავეს, რეკვიზიტებზეც მათ იზრუნეს და რეჟისორიც თავად შეარჩიეს.
„სამსახიობო ხელოვნება ჩემთვის არჩევითი საგანია, მაგრამ პირველივე დღეებიდან სერიოზულად დავინტერესდი. ჩვენი პედაგოგის იდეას სიხარულით დავთანხმდით, მე რთული მისია მხვდა წილად, მაგრამ მეგობრების დახმარებით, მგონი, თავი გავართვი. სახალისო და საინტერესო იყო სპექტაკლზე მუშაობა, დიდი გამოცდილება შევიძინე. პიესა ძალიან მოგვეწონა, მაგრამ გადაკეთება მოგვიწია, რადგან რამდენიმე როლი დავამატეთ“, – ამბობს სპექტაკლის რეჟისორი, თსუ-ის ჰუმანიტარულ მეცნიერებათა ფაკულტეტის ქართული ფილოლოგიის მიმართულების სტუდენტი თეკლა გილაშვილი. 
სპექტაკლზე მუშაობა ასეთივე საინტერესო იყო რეჟისორის ასისტენტის, თსუ-ის ჰუმანიტარულ მეცნიერებათა ფაკულტეტის კულტურის კვლევების მიმართულების სტუდენტის ლაშა მძელურისთვისაც. „რეპეტიციების ყოველი დღე საინტერესო და შთაბეჭდილებებით იყო სავსე. პირადად მე გუნდური მუშაობის გამოცდილება შევიძინე. გარდა ჩემი „თანამდებობისა“, სპექტაკლში პატარა როლიც მაქვს, რომელიც სიამოვნებით შევითავსე. მომავალშიც აუცილებლად მივიღებ მსგავს ღონისძიებაში მონაწილეობას“, – ამბობს ლაშა.
„სპექტაკლში მე ანა ფრანკის „შინაგანი ხმა“ ვარ, რომელიც ანას წარსულის გახსენებაში ეხმარება. სკოლის პერიოდში პატარა როლები მითამაშია, მაგრამ „დიდ სცენაზე“ ჩემი პირველი გამოსვლაა და ძალიან ვღელავ, ეს სრულიად ახალი გამოწვევაა, რომელსაც, ჩემი აზრით, თავი გავართვი“, – გვიზიარებს თავის ემოციას თსუ-ის ჰუმანიტარულ მეცნიერებათა ფაკულტეტის ინგლისური ფილოლოგიის მიმართულების სტუდენტი თამარ ციცქიშვილი. 
თსუ-ის ჰუმანიტარულ მეცნიერებათა ფაკულტეტის ქართული ფილოლოგიის მიმართულების სტუდენტი მარიამ წიკლაური სპექტაკლში ანა ფრანკის „წარმოსახვის ნაყოფია“, რომელიც ცდილობს ანა დააბნიოს, რეალობას ააცდინოს და შეცდომაში შეიყვანოს. „ჩემთვის ამ სპექტაკლში მონაწილეობა იმითაც იყო მნიშვნელოვანი, რომ მეგობრები შევიძინე, ვისწავლე ემოციის გამოხატვა, ეს იყო საუკეთესო დღეები“, – ამბობს მარიამი. 
„სამსახიობო ხელოვნება ყოველთვის მაინტერესებდა. მიხარია, რომ მომეცა შესაძლებლობა ჩემი თავი გამომეცადა. საინტერესო იყო რეპეტიციების პროცესი, როცა ნელ-ნელა იქმნებოდა ახალი სახეები. რაოდენ გასაკვირიც უნდა იყოს, ჩემში „მსახიობი“ აღმოვაჩინე“, – ამბობს თსუ-ის ჰუმანიტარულ მეცნიერებათა ფაკულტეტის ქართული ფილოლოგიის მიმართულების სტუდენტი თინათინ სამთელაძე. 
„სპექტაკლის ერთ-ერთი მთავარი და საინტერესო გმირია ჩემი პერსონაჟი – მეჭე, რომელიც ანას ხან გონებას ურევს, ხან რეალობაში აბრუნებს. თავისთავად, მისასალმებელია, რომ უნივერსიტეტის სცენაზე სტუდენტების მიერ დაიდგა ქართველი დრამატურგის პიესა, რაც ჩვენი პედაგოგის ნინო გელოვანის დამსახურებაა. ვფიქრობ, ასეთი ექსპერიმენტები აუცილებელია, რათა სტუდენტური ცხოვრება უფრო საინტერესო გახდეს“, – აღნიშნა თსუ-ის ჰუმანიტარულ მეცნიერებათა ფაკულტეტის ის-ტორიის მიმართულების სტუდენტმა ლევან გოგოლაძემ. 
სპექტაკლში ანა ფრანკის როლს თსუ-ის ჰუმანიტარულ მეცნიერებათა ფაკულტეტის სტ-უდენტი მარიამ ხოჭოლავა ასრულებს. „სცენაზე პირველად არ გამოვდივარ, მაგრამ ამ სპექტაკლში მთავარი როლის შესრულება დიდ პასუხისმგებლობას მოითხოვს. შევეცადე გმირის შინაგანი სამყარო გადმომეცა. ჩემთვის მნიშვნელოვანია, როგორ შემაფასებს მაყურებელი“, – ამბობს მარიამი.
პრემიერის შემდეგ თავისი შთაბეჭდილება ნინო გელოვანმაც გაგვიზიარა: „სამსახიობო ხელოვნება ძალზე სპეციფიკური საგანია, მას მხოლოდ თეორიული მასალის შესწავლით ვერ ამოწურავ. სასწავლო მეთოდოლოგიიდან გამომდინარე, ეს სპეციალობა ითვალისწინებს როგორც თეორიულ, ისე პრაქტიკულ კომპონენტებს. ამიტომ მივიღე გადაწყვეტილება, რომ მათ თავიანთი თეორიული ცოდნა პრაქტიკაშიც განეხორციელებინათ. სწორედ ამ რეპეტიციების დროს გაიგეს, თუ როგორ უნდა გაითავისოს მსახიობმა როლი. მიხარია, რომ სტუდენტები ასეთი სიყვარულით და სერიოზულობით მოეკიდნენ ამ საქმეს, მუშაობდნენ თავდაუზოგავად, არა იმისთვის, რომ კრედიტები დაეგროვებინათ, არამედ იმიტომ, რომ უყვართ თავიანთი საქმე. სტუდენტებმა წარმატებით გაართვეს თავი ამ ექსპერიმენტს, რისთვისაც მინდა – მადლობა გადავუხადო მათ“, – ამბობს ნინო გელოვანი. 
პრემიერის შემდეგ სტუდენტებმა მსახიობისთვის ყველაზე ძვირფასი ჯილდო – ყვავილები და ოვაციები მიიღეს.

ვრცლად

ჯაზის საღამო თსუ-ში

თბილისის მერიის ბიგ-ბენდმა თსუ-ის სტუდენტებისთვის უსასყიდლო კონცერტი გამართა. ბიგ-ბენდის ორკესტრთან ერთად მაია ბარათაშვილმა, მარიკო ებრალიძემ, გიორგი სუხიტაშვილმა, ნესტან ჯიბლაძემ, ნინი გველესიანმა, ვასილ დოლიძემ და ზაურ ჯიბლაძემ ჯაზ-მუსიკის ცნობილი ამერიკელი კლასიკოსი კომპოზიტორების სიმღერები შეასრულეს. კონცერტზე წარმოდგენილი იყო ქართული სიმღერების ჯაზური ინტერპრეტაცია და გუნდური სიმღერებიც. მრავალფეროვანი რეპერტუარი თბილისის მერიის ბიგ-ბენდის ვოკალისტების შესრულების ინდივიდუალურმა სტილმა განაპირობა.

„თითოეულ ჩვენთაგანს გაგვაჩნია საკუთარი ნიშა და, ამდენად, რეპერტუარი საკმაოდ ფართოა. თანამედროვე მუსიკის სხვადასხვა ჟანრს წარმოვადგენთ. 20 წელია, რაც შევუერთდი ამ ორკესტრს და მაქვს ტრადიციული ჯაზური ნიშა, კერძოდ კი სვინგი, რომელიც განუყოფელი შემადგენელი ნაწილია, რა თქმა უნდა, ჩვენს რეპერტუარში; მასში ასევე შედის ქართული სიმღერები და გუნდური სიმღერებიც“, – აღნიშნა მაია ბარათაშვილმა. 
თბილისის ბიგ-ბენდი არის ოჯახი, მუსიკა, გამოცდილება, ბევრი პოზიტივი – ასე ახასიათებენ ერთმანეთს ბიგ-ბენდის მუსიკოსები. ფიქრობენ, რომ მათი წარმატების მნიშვნელოვანი წილი „პოზიტივის ბუმერანგზე“ მოდის, ანუ იმ დადებით ემოციებზე, რომელსაც ისინი ერთმანეთისგან იღებენ, კონცერტების გამართვისას კი მსმენელსაც უნაწილებენ და შემდეგ მათგან უკან უბრუნდებათ.
„ყველას ჩვენი მიმართულება გვაქვს, თუმცა ეს იმას არ ნიშნავს, რომ სხვა ჟანრი, სხვა სიმღერები არ უნდა შევთავაზოთ მსმენელს. ჩვენ ვმღერით ქართულ სიმღერებს, „ფოლკს“ და ეს ერთი ათად კიდევ ზრდის ჩვენს მუსიკალურ გემოვნებასა და დამოკიდებულებას. რა ემოციაც ტრიალებს გუნდში, კონცერტის მსვლელობისას გადადის მსმენელზეც და შესაბამისად გვიბრუნდება პოზიტივი, ეს დადებითი ემოცია“, – ამბობს მარიკო ებრალიძე. 
თბილისის ბიგ-ბენდი მუდმივად აახლებს შემადგენლობას. ძველი და ახალი თაობის ნაზავი მუსიკალურ შესრულებას კიდევ უფრო განსხვავებულსა და საინტერესოს ხდის. თითქმის ორი წელია, რაც ბიგ-ბენდს ნესტან ჯიბლაძე და ნინი გველესიანი შეუერთდნენ. 
„დიდი გამოცდილებაა ასეთ არაჩვეულებრივ მუსიკოსებთან ერთად მოღვაწეობა. ძალიან ბედნიერი ვარ“, – გვითხრა ნინი გველესიანმა. 
„მინდა ვუთხრა ადამიანებს, რომლებიც ამ კონცერტს ესწრებიან, რომ უფრო მეტად მოგვისმინონ, გაეცნონ ჩვენს მუსიკას და მათი მუსიკალური გემოვნება ბევრად დაიხვეწება“, – განაცხადა ნესტან ჯიბლაძემ. 
თბილისის ბიგ-ბენდის კონცერტი თბილისის სახელმწიფო უნივერსიტეტში სტუდენტური თვითმმართველობის ორგანიზებით გაიმართა. კონცერტი თავად მუსიკოსების მიერ ორგანიზებული პროექტის ფარგლებში შედგა, რომლის მთავარი მიზანიც სტუდენტების მუსიკალური გემოვნების დახვეწა და მათთვის ჯაზ-მუსიკის გაცნობაა. აღნიშნული პროექტის ფარგლებში, თბილისის ბიგ-ბენდი უკვე რამდენიმე წელია უსასყიდლო კონცერტებს მართავს სხვადასხვა უმაღლეს სასწავლებლებში. წელს არჩევანი თსუ-ზე გაკეთდა, თუმცა მუსიკოსები, ცოტა არ იყოს, იმედგაცრუებულები დარჩნენ, თსუ-ის I კორპუსის სააქტო დარბაზი მხოლოდ სანახევროდ გაივსო.
„თბილისის სახელმწიფო უნივერსიტეტი არის საგანმანათლებლო და კულტურის კერა. მეც ვსწავლობდი აქ და ძალიან მიყვარს აქაურობა. უბრალოდ, მიკვირს, სხვა უმაღლეს სასწავლებლებში კონცერტების გამართვისას დარბაზებში მსმენელის ტევა არ არის, აქ კი, როგორც ხედავთ, დარბაზი ვერც კი შეივსო. ეს ხომ არ ნიშნავს, რომ თსუ-ში გემოვნებიანი ღონისძიებების მიმართ ინტერესმა იკლო?!“, – განაცხადა მაია ბარათაშვილმა.
სტუდენტური თვითმმართველობის წარმომადგენლების მიზანი, რის გამოც თბილისის ბიგ-ბენდი თსუ-ში მოიწვიეს, სტუდენტური ცხოვრების გამრავალფეროვნება, გახალისება, გემოვნებიანი მუსიკის შემოთავაზება გახლდათ. საინფორმაციო აქცია, კონცერტის გამართვის შესახებ, სამი დღით ადრე დაიწყო, თუმცა, როგორც ჩანს, ჯაზის მოსმენის სურვილი სტუდენტების მცირე ნაწილს აღმოაჩნდა. 
„ინფორმაცია გავავრცელეთ, მაგრამ ეტყობა ეს მუსიკალური ჟანრი არ აღმოჩნდა სტუდენტებისთვის საინტერესო“, – აღნიშნა თსუ-ის სტუდენტური თვითმმართველობის წარმომადგენელმა შოთა კეზერაშვილმა.
მსმენელი იყო ცოტა, მაგრამ ვინც თბილისის ბიგ-ბენდის მუსიკალურ საღამოზე დასასწრებად მოვიდა, ყველა გახლდათ ჯაზ-მუსიკის ერთგული მსმენელი: „ჩემთვის უპირველესი მუსიკალური მიმდინარეობა ჯაზია, მაია ბარათაშვილი კი – უსაყვარლესი შემსრულებელი. დიდი მადლობა ორგანიზატორებს“, – გვითხრა ჰუმანიტარულ მეცნიერებათა ფაკულტეტის II კურსის სტუდენტმა ლიკა მამალაძემ.
თბილისის ბიგ-ბენდმა თსუ-ის სტუდენტებისთვის კონცერტი 3 ნოემბერს გამართა.

ვრცლად

უკვე მეოთხედ მონაწილეობა მსოფლიო მარათონში

მსოფლიო სპორტის ის-ტორიაში ყველაზე მასშტაბური საქველმოქმედო ღონისძიება – მსოფლიო რბენა – 7 მაისს კახეთში გაიმართება. მასში მონაწილეობას მიიღებს 6 კონტინენტი, 24 ქვეყანა, 25 ლოკაცია და 100 ათასზე მეტი მორბენალი. მსოფლიო რბენას უკვე მე-4 წელია საქართველოც უერთდება. საქველმოქმედო აქციაში მონაწილეობის საშუალება აქვს 18 წლის ზემოთ ნებისმიერ მოქალაქეს. 
მსოფლიო რბენის არსი იმაში მდგომარეობს, რომ არ არის განსაზღვრული სარბენი მანძილი და დრო, არ არსებობს ტრადიციული ფინიშის ხაზი. აქციას ეყოლება ორი გამარჯვებული – ერთი ქალი და ერთი მამაკაცი, რომლებიც თავად აირჩევენ – თუ მსოფლიოს რომელ წერტილში მიიღებენ მონაწილეობას 2018 წლის ღონისძიებაში.

ამ დღესთან დაკავშირებით ივანე ჯავახიშვილის სახელობის თბილისის სახელმწიფო უნივერსიტეტის სტუდენტებს მსოფლიო რბენის „Wings for Life“-ის ფონდის დამფუძნებელი ჰაინც კინიგადნერი ეწვია. იგი ცნობილი ათლეტი, 1984 და 1985 წლების მსოფლიო ჩემპიონი მოტოკროსში და მრავალი ტურნირის გამარჯვებულია. 2003 წელს, შვილის ტრაგიკული შემთხვევის გამო, რომელსაც ესაჭიროებოდა დახმარება, მეგობართან დიტრიხ მატეშიცთან ერთად, „Wings for Life“-ის ფონდი ჩამოაყალიბა. 
ფონდი „Wings for Life“ წარმოადგენს ზურგის ტვინის დაზიანებების კვლევის საერთაშორისო არაკომერციულ ფონდს. მისი მისიაა ზურგის ტვინის დაზიანებების განკურნების საშუალებების პოვნა. ფონდი მთელი მსოფლიოს მასშტაბით აფინანსებს საერთაშორისო კლასის სამეცნიერო კვლევებს და კლინიკურ ცდებს, რომლებიც მიზნად ისახავს ზურგის ტვინის დაზიანებების განკურნებას.
ჰაინც კინიგადნერთან შეხვედრას თსუ-ს რექტორის მოადგილე მიხეილ ჩხენკელი, მსოფლიო მარათონის კეთილი ნების ელჩები საქართველოში და დაინტერესებული სტუდენტები ესწრებოდნენ. 
თბილისის სახელმწიფო უნივერსიტეტში გამართულ შეხვედრაზე ფონდის წარმომადგენლებმა და კეთილი ნების ელჩებმა ისაუბრეს მსოფლიო მარათონის ისტორიასა და მნიშვნელობაზე, თითოეული მონაწილეს წვლილზე საქველმოქმედო ღონისძიებაში.
თსუ-ს რექტორის მოადგილის მიხეილ ჩხენკელის განცხადებით: „მსოფლიო მარათონში მონაწილეობა თითოეული ჩვენგანის ადამიანური ვალია. ამით ჩვენ ხელს შევუწყობთ იმ სამეცნიერო კვლევებსა და ცდებს, რომელიც, თავის მხრივ, უზრუნველყოფს ზურგის ტვინის დაზიანების განკურნებას. მიხარია, რომ ამ პროექტში თბილისის სახელმწიფო უნივერსიტეტი აქტიურადაა ჩართული. 1000-მდე უნივერსიტეტელმა უკვე დაუჭირა მხარი, საკუთარი მონაწილეობით, მსოფლიო აქციას. ჩვენი სტუდენტები და პროფესორ-მასწავლებლები წელს უკვე მეოთხედ მიიღებენ მონაწილეობას მსოფლიო მარათონში და ამით კიდევ ერთხელ დაამტკიცებენ, რომ დაუძლეველი არაფერია“.
ფონდის დამფუძნებელმა ჰაინც კინიგადნერმა მადლობა გადაუხადა ქართულ მხარეს პროექტის მხარდაჭერისთვის და აღნიშნა, რომ 2017 წელს მსოფლიო რბენა საქართველოში სპორტისა და ახალგაზრდობის სამინისტროს ორგანიზებით Check in Georgia-ს ფარგლებში ტარდება. „ეს პროექტი ჩვენი ფონდის ერთ-ერთი მნიშვნელოვანი მიღწევაა. World Run-ის მიზანია დაეხმაროს ადამიანებს, რომელთაც ზურგის ტვინის დაზიანება აქვთ. ეს ნიშნავს, რომ პროექტი არის ყველასთვის, რადგან ამ დაზიანებების 50% ხდება ქუჩაში, ავტოსაგზაო შემთხვევების დროს და მისგან დაზღვეული არავინაა. ამ შემთხვევაში სირბილი არ არის მხოლოდ ჯანმრთელობა, ეს არის, პირველ რიგში, კარგი საქმე და დახმარების გაწევა ამ დაზიანების მქონე ადამიანებისთვის“, – აღნიშნა „Wings for Life“-ის ფონდის დამფუძნებელმა ჰაინც კინიგადნერმა. 
აქვე უნდა აღინიშნოს ისიც, რომ 2017 წელს, Check in Georgia-ს ფარგლებში, საქართველო უმასპინძლებს 13 საერთაშორისო-სპორტულ ღონისძიებას, რაც უპრეცედენტო შემთხვევაა ქართული სპორტის ისტორიაში. ყველა ეს ღონისძიება თუ ასპარეზობა იმავე მიზანს ემსახურება, რასაც Check in Georgia – მეტი ადამიანი ჩამოვიდეს ჩვენს ქვეყანაში, მიიღოს პროფესიული გამოცდილება, დაისვენოს და საკუთარი ყოფნა საქართველოში მონიშნოს მსოფლიო რუკაზე. წელს, მხოლოდ სპორტული ღონისძიებების ფარგლებში საქართველო 70-მდე ქვეყნის უამრავ ვიზიტორს ელის. 
„უკვე მეოთხე წელია, რაც ეს გარბენი არსებობს. წინა სამ მარათონში მივიღე მონაწილეობა და წელსაც ვაპირებ სირბილს. ჩვენ, ჯანმრთელ ხალხს, ვისაც არ გვაქვს ზურგის ტვინის ტრავმა, შეგვიძლია ჩვენი წვლილი შევიტანოთ ამ დიდ პროექტში და დავეხმაროთ მათ, ვისაც ეს პრობლემა აწუხებს“, – განაცხადა თსუ-ის სტუდენტმა რატი გელაშვილმა. 
ბავშვთა და ახალგაზრდობის ეროვნული ცენტრის წარმომადგენელმა მერაბ დუკაშვილმა ხაზი გაუსვა აქციის საქველმოქმედო მიზნების მნიშვნელობას და აღნიშნა, რომ .„ეს პროექტი მნიშვნელოვანია იქიდან გამომდინარე, რომ ჯანმრთელი ცხოვრების წესის დანერგვა ხდება. ამავე დროს, ეს შეჯიბრი არის საკუთარი შესაძლებლობების გამოცდა. მაგრამ ყველაზე უმთავრესია, რომ ჩვენ, ყველანი, ქველმოქმედებას ვეწევით და საკმაოდ დიდ საქმეს ვაკეთებთ – ვეხმარებით იმ პრობლემის მოგვარებას, რასაც ზურგის ტვინის დაზიანება ჰქვია“, – აღნიშნა მერაბ დუკაშვილმა. 
მსოფლიო რბენაში მონაწილეების აქტიური ჩართულობა და ყოველ წელს ღონისძიების პოპულარობის გაზრდა, სხვა გარემოებებთან ერთად, მსოფლიო რბენის კეთილი ნების ელჩების დამსახურებაც არის. ისინი მსოფლიო რბენის პროექტს ხალხის ყურადღების მიპყრობაში ეხმარებიან. საქართველოში კეთილი ნების ელჩები არიან ცნობილი სპორტსმენები: სეულის ოლიმპიადის პრიზიორი სირბილში მაია აზარაშვილი (ამავდროულად ღონისძიების სპორტული დირექტორი), კალათბურთელები: კოტე ტუღუში და რეზი როგავა, ძიუდოისტი ვარლამ ლიპარტელიანი, 2015 წლის საუკეთესო სპორტსმენი – მოჭიდავე ვლადიმერ ხინჩეგაშვილი, მრბოლელი მევლუდ მელაძე, მოთხილამურე ივა წიკლაური, მორაგბეები: ვასილ ლობჟანიძე და ბაჩო კოლელიშვილი, პარაოლიმპიელი ირმა ხეცურიანი და სხვები. 
მსოფლიო პროექტში აქტიურად არიან ჩართულნი არა მარტო სპორტსმენები, არამედ ცნობილი ადამიანებიც: ინტელექტუალი გიორგი ბაქრაძე, მუსიკოსები: აჩიკო გულედანი, ნიკა კოჩაროვი და ელენე კალანდაძე, ქირურგი და გადაცემა „ექიმების“ წამყვანი ლევან ხარაშვილი, ნეიროქირურგი ბუბა შალამბერიძე, ნიკა გრიგოლია, ქეთი ხატიაშვილი, დავით ქაცარავა, ირაკლი კაკაბაძე, ნინუცა მაყაშვილი და სხვები.
მსოფლიო რბენაში მონაწილეობის მსურველთა რეგისტრაცია 21 მარტს დაიწყო ვებ-გვერდზე www.wingsforlifeworldrun.com და 4 მაისს 1500 საათზე დასრულდება. საქართველოში მონაწილეობის ღირებულებაა 30 ლარი. ღონისძიებიდან შემოსული თანხა სრულად გადაერიცხება „Wings for Life“-ის ფონდს. 
7 მაისს საქართველო მსოფლიო ტურისტულ რუკაზე კიდევ ერთხელ დაფიქსირდება, როგორც საერთაშორისო სტანდარტის სპორტული და კულტურული ღონისძიებების გამართვის ადგილი.

ვრცლად

სტუდენტურმა თეატრმა სპექტაკლი „ბერნარდა ალბას სახლი“ დადგა

12 აპრილს სტუდენტური თეატრის „სხვენის“ დასმა ესპანელი დრამატურგის ფედერიკო გარსია ლორკას პიესის მიხედვით სპექტაკლი „ბერნარდა ალბას სახლი“ დადგა. „ბერნარდა ალბას სახლი“ ფედერიკო გარსია ლორკას ბოლო პიესაა, რომლის გამოქვეყნებიდან ორ თვეში იგი დახვრიტეს. მოქმედება ესპანეთის ერთ-ერთ ოჯახში, ბერნარდა ალბას მეორე ქმრის გარდაცვალებიდან მეორე დღეს ვითარდება: მისი ხუთი ქალიშვილი დედის ავტოკრატიის ქვეშ იმყოფება; თავის მხრივ, ბერნარდა ალბა სოფლის იდეოლოგიის სრულ ზეგავლენას განიცდის და ოჯახის ავტორიტეტის შენარჩუნებას ქალიშვილების სრული გამოკეტვით ცდილობს; თითოეული მათგანი ოცნებობს თავისუფლებაზე, თავისუფლება კი მათთვის გათხოვებასთან ასოცირდება, გამონაკლისი არც ბერნარდა ალბას 80 წლის დედაა; თავისუფლების სურვილი დედის ნების გაუთვალისწინებლობის შიშს, ოჯახში კონფლიქტს, ქალიშვილებს შორის დაპირისპირებას და, უფრო მეტიც, მოსამსახურესთანაც კი მუდმივ ჩხუბს იწვევს. ტრაგედია მას შემდეგ ვითარდება, რაც კონფლიქტი ერთი მამაკაცის გამო იწყება, რომელიც პიესაში ფიზიკურად არ ჩანს. შედეგად ბერნარდა ალბა კარგავს უმცროს ქალიშვილს – ადელას, ერთადერთ პიროვნებას, რომელიც დედის ავტოკრატიასა და სოფლის იდეოლოგიას არ შეეგუა. 
ფედერიკო გარსია ლორკა წერდა, რომ პიესაში აღწერილი ამბავი რეალურია. სპექტაკლის აღდგენა თეატრში „სხვენი“ დასის მსახიობმა ქეთევან ოქუაშვილმა გადაწყვიტა, რადგან პრობლემა, რომელიც პიესაში ავტორმა აღწერა, დღესაც არ კარგავს აქტუალობას. 
ქეთევან ოქუაშვილმა სპექტაკლში ბერნარდა ალბას როლი შეასრულა, რომელსაც წარმოდგენის დასრულების შემდეგ გავესაუბრეთ: „არსებობს მაყურებელი, რომელიც მოვა და მხოლოდ საპნის ოპერას დაინახავს – ხუთი ქალის ისტორიას, რომელიც სახლში გამოკეტილი ცხოვრობს. თუმცა, ასევე არსებობს მაყურებელი, რომელიც უფრო ღრმად ჩაიხედავს და აღმოაჩენს დიქტატურის რეალურ გავლენას ადამიანებზე და მის ტრაგიკულ შედეგებს“. 
„ბერნარდა ალბას სახლი“ სტუდენტურმა თეატრმა „სხვენმა“ განახლებული შემადგენლობით წარმოადგინა. ბერნარდა ალბას მსახურისა და ქალიშვილების როლი სალომე ბადაგაძემ, ელენე ჩხეიძემ, თეო ცუცქირიძემ, თათა მირიანაშვილმა, სალომე ჭონიშვილმა, მედეა სვანიძემ, მარიამ ვარდიაშვილმა და თაკო ძიძიკაშვილმა შეასრულეს. სპექტაკლის რეჟისორი გიორგი გომურაშვილი გახლდათ.

ვრცლად

გურამ დოჩანაშვილის შეხვედრა მკითხველთან

სახის თვალებით ბრმები გულის თვალებით ხედავენ! – ასეთია გურამ დოჩანაშვილის ბოლო რომანის მთავარი გზავნილი. 

„ბრმად ყოფილი და...“ გასულ წელს გამოიცა, თუმცა, როგორც „ნატოსა და ევროკავშირის საინფორმაციო ცენტრში“ 9 დეკემბერს გამართულ საჯარო ლექციაზე ითქვა, რომანს გაგრძელებაც ექნება და მას მკითხველი მომავალ წელს გაეცნობა. ლექცია ცენტრის მიერ გამართული შეხვედრების ციკლის „მე-ევროპელის“ ფარგლებში გაიმართა და მასზე დასწრება თავისუფალი იყო, რამაც უამრავ ახალგაზრდას საყვარელ მწერალთან პირისპირ შეხვედრის და გასაუბრების შესაძლებლობა მისცა. წლევანდელი დეკემბრის სუსხისა და, იმის მიუხედავად, რომ იმ დღეს 2-ჯერ გაითიშა სინათლე თავისუფლების მოედანზე (სადაც ნატოსა და ევროკავშირის საინფორმაციო ცენტრია განთავსებული), დარბაზი მაინც სავსე იყო. შეკრებილებს კითხვები უამრავი ჰქონდათ, თუმცა, ყველა კითხვის დასმა და ყველაფერზე პასუხის მიღება ვერ მოხერხდა. 

80 წელს მიღწეული მწერალი, ძირითადად, ახალი რომანის შესახებ საუბრობდა, რომლის ინსპირაციის წყაროც სახარებისეული ამბავია ბრმად დაბადებულ ყრმაზე. „ - ვინ ცოდა, ამან თუ ამის მშობლებმაო? მაცხოვარი პასუხობს: - არც მან და არც მისმა მშობლებმა, არამედ იმიტომ დაიბადა ბრმად, რომ განმტკიცდეს მისით ძლიერება ღმრთისა!” – ეს ძლიერება ღმრთისა რითი განმტკიცდა, არსად არის ნათქვამი”, – ამბობს მწერალი და სწორედ იმის გარკვევას ცდილობს, რას შეიძლება ნიშნავდეს ბრმად დაბადება და ბრმად ყოფნა.

ცნობილია, რომ ნაწარმოებზე მუშაობისას გურამ დოჩანაშვილი სამების ლავრაში ცხოვრობდა. ამ გამოცდილების გარდა, მისივე თქმით: „ძალიან მეხმარებოდა და მეხმარება დავით ფაილოძე – ის ადამიანი, რომელმაც ორივე თვალის მხედველობა დაკარგა 1989 წლის 9 აპრილის ღამეს. ეგეთი შემართული ადამიანი ცოტა მეგულება. ძალიან დავუახლოვდი და მასში სამაგალითო სიმტკიცე დავინახე. ისე კი ვღელავ ამ ნაწარმოებთან დაკავშირებით! ხშირად ვეკითხები რჩევას უწმინდესს, მისი პასუხები ძალიან მეხმარება – ვიცი, რომ ნამდვილი, ნაღდი პასუხებია!”

მწერლის თქმით, სწორედ უწმინდესმა და უნეტარესმა, საქართველოს კათოლიკოს-პატრიარქმა ილია მეორემ მისცა ძალა ხანდაზმულობის ასაკში ეს წიგნი დაეწერა.

მკითხველთა ნაწილი უკვე იცნობს დოჩანაშვილის ახალ ნაწარმოებს. გამოხმაურებების მიხედვით თუ ვიმსჯელებთ, მწერლის ღვაწლს უქმად არ ჩაუვლია და „ბრმად ყოფილი და...“-ს წაკითხვის უდიდესი სიამოვნება ჯერ კიდევ წინ გვაქვს მათ, ვისაც აქამდე ხელში ვერ ჩაუვარდა დოჩანაშვილის ახალი ნაწარმოები.

ვრცლად

ყველა სპორტულმა სექციამ თსუ-ს სხვადასხვა თანრიგის მედალი მოუტანა

მიმდინარე წელი საკმაოდ წარმატებული იყო უნივერსიტეტისათვის სპორტული მიმართულების მხრივ. უნივერსიტეტის სტუდენტური საკალათბურთო გუნდი გახდა სტუდენტური საკალათბურთო ლიგის გამარჯვებული, ფუტსალის სტუდენტურმა გუნდმა მოიგო საუნივერსიტეტო ლიგა ფუტსალში და გაემგზავრა ევროპის სტუდენტურ ჩემპიონატზე ფუტსალში, სადაც 8 საუკეთესო გუნდს შორის მოხვდა. თსუ-ის ისტორიაში პირველად მოიპოვა გუნდმა საქართველოს ჩემპიონის ტიტული ფუტსალის პროფესიონალურ ჩემპიონატში: ფუტსალის სტუდენტურმა გუნდმა იასპარეზა ფუტსალის ჩემპიონთა ლიგაზე და გადალახა 2 საკვალიფიკაციო ეტაპი. 

2017 წელს თსუ 2 ოქროს, 2 ვერცხლის და 1 ბრინჯაოს მედალოსანი გახდა – მოვიგეთ „სტუდენტური დღეები“. 

მიმდინარე წელს უნივერსიტეტში არსებულმა ყველა სპორტულმა სექციამ თსუ-ს მოუტანა სხვადასხვა თანრიგის მედალი. ამასთან დაკავშირებით ოქტომბერში უნივერსიტეტში გაიმართა შემაჯამებელი გალა დაჯილდოება, სადაც ყველა წარმატებული სექცია და სპორტსმენი დაჯილდოვდა.

მორიგ სიახლეებზე გვესაუბრება თსუ-ის კულტურისა და სპორტის დეპარტამენტის ხელმძღვანელი ირაკლი ხარჯავანიძე:

უნივერსიტეტის სტუდენტურმა გუნდა უკვე მოიპოვა პირველი სეზონის ჩემპიონის ტიტული

უნივერსიტეტის სპორტული გუნდები მონაწილეობას იღებენ კალათბურთის სტუდენტური ლიგის პირველ ეტაპში, სადაც გუნდი ასპარეზობს წარმატებით. აღსანიშნავია, რომ ლიგაში მონაწილეობს 20 უმაღლესი სასწავლებელი. ჩემპიონატი იმართება ორ სეზონად, მთელი სასწავლო წლის მანძილზე, ანუ ოქტომბრიდან ივნისამდე. უნივერსიტეტის სტუდენტურმა გუნდა უკვე მოიპოვა პირველი სეზონის ჩემპიონის ტიტული, წარმატებით იასპარეზა რა მთელი სეზონის მანძილზე. ბოლოს ორ გასვლით ტურში – ქუთაისსა და ბათუმში დიდი უპირატესობით დაამარცხა ადგილობრივი უმაღლესი სასწავლებლის გუნდები.

წარმატებით ასპარეზობს ფუტსალის სტუდენტური ნაკრებიც, საქართველოს საუნივერსიტეტო სპორტის ფედერაციის თასზე, რომელშიც 32 უმაღლესი სასწავლებელი მონაწილეობს. სხვათა შორის, თსუ სამ გზის გამარჯვებულია აღნიშნული ჩემპიონატის და მსგავსი შედეგი არც ერთ უმაღლეს სასწავლებელს არ აქვს. გუნდი ამჟამად იმყოფება ნახევარ ფინალში და დიდი იმედი მაქვს, წლის ბოლოს მეოთხედ მოვიგებთ თასს.

აღსანიშნავია თსუ-ის სტუდენტების ეკო-ლაშქრობები, რომელსაც საფუძველი ჩაეყარა მიმდინარე წლის ოქტომბერში და საკმაოდ საინტერესო და წარმატებული პროექტი აღმოჩნდა.

შეთანხმება კომპანია ჰიუნდაისთან

სულ რამდენიმე დღის უკან პრაქტიკულად მივაღწიეთ შეთანხმებას კომპანია ჰიუნდაისთან, რომელიც გახდება ჩვენი საკალათურთო კლუბის სპონსორი, რომელიც მონაწილეობს საქართველოს ეროვნული საკალათბურთო ჩემპიონატის მე-2 ლიგაში. ეს მოგვცემს საშუალებას გავაძლიეროთ გუნდი და ვიბრძოლოთ უმაღლეს ლიგაში გადასასვლელად, რათა უმოკლეს პერიოდში კვლავ დავუბრუნოთ დიდება უნივერსიტეტის საკალათბურთო კლუბს და თსუ-ს.

წინასაახალწლო ღონისძიებები თსუ-ში

წინასაახალწლო პერიოდი განსაკუთრებით დატვირთულია ჩვენი დეპარტამენტისთვის. იგეგმება სხვადასხვა საახალწლო და სოციალური პროექტები. თსუ-ში გაიმართება ტრადიციული საახალწლო წვეულება ბავშვებისთვის, სადაც თსუ-ის თეატრალური დასი „სხვენი“ გამართავს წარმოდგენას.

კულტურისა და სპორტის დეპარტამენტი აქტიურად გეგმავს და მუშაობს 2017 წელს გასამართ ღონისძიებებზე. მომავალ წელს უნივერსიტეტი სტუდენტებს შესთავაზებს მრავალფეროვან პროექტებსა და გაზრდილ სპორტულ სექციებს.

მინდა, ვისარგებლო შემთხვევით და მივულოცო დამდეგი შობა-ახალი წელი უნივერსიტეტს და, ზოგადად, საუნივერსიტეტო საზოგადოებას.

მინდა, ვუსურვო მშვიდობა და განვითარება!

ვრცლად

ნორჩ ჰუმანიტართა სკოლის მოსწავლეთა მხატვრული ნამუშევრების გამოფენა

დაჩი დათუაშვილი რუსთავის კერძო სკოლა „მილენიუმის“ მოსწავლეა. ხატვა მისი ჰობია, თუმცა, ფიქრობს, რომ შესაძლოა ეს მის მეორე პროფესიადაც იქცეს. ამის სერიოზული მიზეზიც აქვს: მის მიერ კომპიუტერში, პლანშეტის საშუალებით შექმნილი ანიმაციური პერსონაჟები უკვე პოპულარულები გახდნენ თანატოლებში.

თბილისის 31-ე საჯარო სკოლის მოსწავლეს ბაია ლეკვეიშვილს პორტრეტების ხატვა უყვარს. ნაცნობების გარდა ისტორიულ პერსონაჟებსაც ხატავს. მისი ბოლო ნამუშევარი ჰენრი VI-ის პორტრეტია, რომელიც, თავისი წარმოდგენით, წიგნის წაკითხვის შემდეგ შექმნა.

ნორჩი მხატვრები: ელენე და გიორგი ბერაიები, სოფიო ხუციშვილი, ბაქარ სიურგალი, ბაია და ნინო ლეკიაშვილები, სალომე ელბაქიძე, მარიამ ქობულაშვილი, მარიამ სიფრაშვილი, მარიამ ქვარცხავა, ეკატერინე მაგრაქველიძე, ბარბარე ზარიძე, იოანე და ალექსანდრე ზარიძეები, საბა ხაჭაპურიძე, დაჩი დათუაშვილი, ნინო წიკლაური, იმედა აფციაური, თამარ ნოზაძე, ლაშა არჯევანიძე, თამარ ვარადაშვილი თსუ-ის საბავშვო უნივერსიტეტის ნორჩ ჰუმანიტართა სკოლის მოსწავლეები არიან, მათი ეს განსხვავებული ნიჭი და უნარი ამავე სკოლის კოორდინატორმა თამთა გოგუაძემ შენიშნა და თსუ-ის მუზეუმის საექსპოზიციო დარბაზში 15 დეკემბერს, წინასაახალწლო დღეებში, მათთვის გამოფენა მოაწყო.

„მიუხედავად იმისა, რომ ხატვა არ შედის ნორჩ ჰუმანიტართა სკოლის ლექციების ცხრილში, ჩვენ მაინც გამოვავლინეთ ისინი და სიურპრიზი გავუკეთეთ. ინტელექტუალური განვითარების გარდა, თსუ-ის ჰუმანიტარულ მეცნიერებათა ფაკულტეტი ცდილობს ნორჩ ჰუმანიტართა სკოლაში მოსწავლეთა შემოქმედებითი აქტივობა წაახალისოს. 2016 წლის შემოდგომის სემესტრში მოსწავლეებს საშუალება მიეცათ - თავად დაემზადებინათ თექის ნიმუშები ქალბატონი თამარ წეროძის ხელმძღვანელობით. ვორკშოპში შექმნილი ნიმუშები წარმოდგენილი იყო გამოფენაზე. 2016 წლის სამხატვრო გამოფენა პირველი მცდელობა იყო მოსწავლე-ახალგაზრდობის შემოქმედებითი ჩართვისა თბილისის სახელმწიფო უნივერსიტეტის ცხოვრებაში - აღნიშნა თამარ გოგუაძემ თსუ-ის ნორჩ ჰუმანიტართა სკოლის მოსწავლეთა მხატვრული ნამუშევრების გამოფენაზე, სადაც თბილისისა და რუსთავის სკოლების უფროსკლასელ მოსწავლეთა მიერ შექმნილი ფერწერული, გრაფიკული, მხატვრული ფოტოგრაფიის, მცირე პლასტიკის, გამოყენებითი ხელოვნებისა და კომპიუტერული გრაფიკის ნიმუშები გამოიფინა.

გამოფენის გახსნაზე მისასალმებელი სიტყვებით გამოვიდნენ თსუ-ის ჰუმანიტარულ მეცნიერებათა ფაკულტეტის დეკანი ნანა გაფრინდაშვილი, საბავშვო უნივერსიტეტის ხელმძღვანელი მარინა ლომოური, არქეოლოგი, პროფესორი ვახტანგ ლიჩელი, მხატვარი ანტონ ბალანჩივაძე, რუსთავის N#6 და #7 საშუალო სკოლების პედაგოგი ვაჟა ქარუხნიშვილი, თსუ-ის ასოცირებული პროფესორი ქეთევან ხუციშვილი და თსუ-ის ნორჩ ჰუმანიტართა სკოლის კოორდინატორი თამარ გოგუაძე. გამომსვლელებმა მოსწავლეებს მიულოცეს გამოფენაში მონაწილეობა და წარმატება უსურვეს მომავალ შემოქმედებით კარიერასა და ინტელექტუალურ განვითარებაში. წინა საშობაო განწყობის შესაქმნელად, ტრადიციული მუსიკალური ფონის თანხლებით, უნივერსიტეტი მოსწავლეებსა და სტუმრებს საახალწლო ტკბილეულით გაუმასპინძლდა.

ვრცლად

დათო მაღრაძის კრებულის პრეზენტაცია თსუ-ში

დათო მაღრაძის ლექსები ყველგან და ყოველ დროს სათქმელი ლექსებია. შემთხვევითი არ არის, რომ მისი პოეზია უკვე მსოფლიოს მრავალ ენაზე ითარგმნება და მის შემოქმედებას მხოლოდ საქართველოში არ ჰყავს მკითხველი. ალბათ ამიტომ, შემთხვევითი არ არის, რომ მწერალმა როსტომ ჩხეიძეს მას „მოგზაური“ და „ქართული კულტურის დესპანი“ უწოდა.

„უსადაურო“ მიმაჩნია არა მარტო დათო მაღრაძის შემოქმედებაში ერთ საუკეთესო კრებულად, არამედ ბოლო წლების ქართულ პოეზიაში წარმატებულ მონაპოვრად. ასეთი სრულფასოვანი კრებული იშვიათია... იმ არა ერთი სტატიისა, რაც დათო მაღრაძის პოეზიაზე დაწერილა ჩვენში თუ უცხოეთში, არც ერთი დასათაურებულა ამგვარად: დათო მაღრაძე - პოეტი-მოგზაური - ყოფით-სიმბოლური ორიენტირებით ყველაზე უკეთ მიგვანიშნებს მისი და მისი ლირიკული გმირის პიროვნულ ბუნებასა და ცხოვრების სტილზე. მის მიერ შემოწერილი მარშრუტის აღდგენაც განა ნაკლებ წაგვადგება ჩვენი ეპოქის ცივილიზებული სამყაროს ზოგადი სურათის წარმოსახვისთვის? მისმა მკითხველმა შეიძლება ხელშესახებად განიცადოს ის საზოგადოებრივ-კულტურული რეალობა, თუ რა ფონზე მიიკვლევს გზას ჩვენი სახელმწიფო ადგილის დასამკვიდრებლად საკაცობრიო ცხოვრებაში. დათო მაღრაძის ახალი პოეტური კრებული - „უსადაურო“, გამჭვირვალე ტექსტებითა და მინიშნებებით, მხატვრულ შთამბეჭდაობასთან ერთად, საზოგადოებრივი სიმძაფრითაც განმსჭვალულა და განგაშის ზარივით ხმიანებს.

კრებული მომცროა, რაც ნიშანდობლივია დათო მაღრაძის შემოქმედებითი ნატურისა და სტილისთვის - მხოლოდ აუცილებლობის დროს ამოთქვას სათქმელი და არა პოეტური ტექნიკის დემონსტრირებისთვის, უმეტესწილად ერთფეროვნების დაღს რომ ასვამს ხელხვავიან და არც თუ უნიჭო ლირიკოსთა ბომბორა წიგნებს. დათო მაღრაძის პაწია წიგნი კი იმ შინაგანი სივრცითაა განათებული, ასე აუცილებელი რომ გამხდარა საბედისწერო მოსახვევში მდგარი ერისათვის, რომელმაც კიდევ ერთხელ უნდა დააღწიოს თავი ხიფათს და რომელიც უნდა შეიქნას ბუნებრივი, სრულუფლებიანი მონაწილე საკაცობრიო ცხოვრებისა (და არა ვიღაცის კუდიმდევარი)”, - ამბობს როსტომ ჩხეიძე. იგი კრებულის სახელწოდებას ასე განსაზღვრავს: „ეს სიტყვა „უსათაუროს“ ასოციაციას რომ იწვევს, ერთმანეთს ფსიქოლოგიური ეფექტით ანუ მონაცვლეობით რომ უნდა წაეფაროს და (უსადაურობა და უსათაურობა) ამ ორმაგობით უფრო ხელშესახებად რომ განგვაცდევინოს მცირერიცხოვანი ერის შვილის ყოფა - მოქცეული მსოფლიო მღელვარებაში, სწორედ ესაა ამ სახელწოდებაში ჩადებული. უსადაურობის ზღურბლზე მდგარი ხალხის მიერ საკუთარი ფესვების შენარჩუნებისკენ სწრაფვა და, ამ ზღურბლიდან შემოტრიალების შემთხვევაში, დავიწყებისთვის, უსათაურობისთვის განწირულობა - ესაა კრებულის სახელწოდების არსი“, - წერს როსტომ ჩხეიძე დათო მაღრაძის შემოქმედებაზე.

„საგულისხმოა, რომ სათაურიდანვე პოეტი შეეხმიანება რუსთაველს - „სადაურსა სად წაიყვან!“ - და, ამ შემთხვევაში, „უსადაურობა“, ალბათ, იმასაც გულისხმობს, რომ პოეტი თავისი ლექსებით მთელ სამყაროს ელაპარაკება და ამიტომ სამყაროს შვილია. შეიძლება ითქვას, რომ დათო მაღრაძეს „გაუმართლა“ იმ თვალსაზრისითაც, რომ მისი პოეზია მსოფლიოს რამდენიმე ენაზეა თარგმნილი და ეს მეტაფორული ნათქვამი პირდაპირი მნიშვნელობითაც შეგვიძლია გავიგოთ,“ - აღნიშნა მწერალმა, ფილოლოგიის მეცნიერებათა დოქტორმა მაია ჯალიაშვილმა.

დავით მაღრაძის ახალი კრებულის განხილვას დაესწრო უნგრელი ქართველოლოგი ჰაინალკა ბაბირაკი, რომელმაც პოეტი მსოფლიო მოქალაქედ მოიხსენია.

დათო მაღრაძის ახალი კრებულის განხილვას თსუ-ის რექტორი გიორგი შარვაშიძეც ესწრებოდა, რომელმაც პოეტს საჩუქრად თსუ-ის გამომცემლობის წიგნები: „დონ კიხოტი“ და „ვეფხისტყაოსანი“ გადასცა.

„დათო მაღრაძე დღეს ცნობილი პოეტია, რომლის შემოქმედებას იცნობენ არა მარტო საქართველოში, არამედ ევროპასა და სხვა ქვეყნებშიც. იგი დღეს თავის მშობლიურ „93-ე აუდიტორიაში“ დაბრუნდა. სასიხარულოა, რომ ჩვენი კურსდამთავრებულები კვლავ ბრუნდებიან უნივერსიტეტში და გვაცნობენ თავიანთ შემოქმედებას“, - განაცხადა გიორგი შარვაშიძემ.

შეხვედრაზე დათო მაღრაძემ თავისი ახალი კრებულიდან ლექსები წაიკითხა და დამსწრე საზოგადოებას მადლობა გადაუხადა: ,,მიხარია, რომ ჩემი წიგნის განხილვა უძვირფასეს ადგილას, თბილისის სახელმწიფო უნივერსიტეტის იმ აუდიტორიაში გაიმართა, რომელთანაც ბევრი ძვირფასი მოგონება მაკავშირებს. მნიშვნელოვანია ისიც, რომ ეს არ იყო ჩვეულებრივი პრეზენტაცია. ჩემი შემოქმედების შესახებ არა ერთი მნიშვნელოვანი მოსაზრება მოვისმინე, რისთვისაც დიდი მადლობა მინდა გადავუხადო ალექსანდრე ორბელიანის საზოგადოებასა და ჟურნალს „ჩვენი მწერლობა“, განსაკუთრებით კი როსტომ ჩხეიძეს, ასევე თსუ-ის ხელმძღვანელობას და დამსწრე საზოგადოებას, რომლებმაც ჩემს ირგვლივ არაჩვეულებრივი გარემო შექმნეს“, - განაცხადა „პოეტმა-მოგზაურმა“ დათო მაღრაძემ.

ვრცლად