რექტორთან პირისპირ

რისი გაკეთება იგეგმება უნივერსიტეტში

- რამდენადაც ცნობილია, აპირებთ კურსდამთავრებულთა ფონდის შექმნას. რას მოემსახურება ეს ფონდი?

- ვვარაუდობთ, რომ მომავალ სემესტრში შეიქმნება კურსდამთავრებულთა ასოციაცია, უნივერსიტეტის მეგობართა კლუბი და უნივერსიტეტის განვითარების ფონდი, რომლებიც აქტიურად დაიწყებენ ფუნქციონირებას 2017-2018 სასწავლო წლისთვის. 

- რა გეგმები გაქვთ ინგლისური ენის სწავლების გაძლიერებასთან დაკავშირებით? თქვენი ინფორმაციით, რამდენად სათანადოდ ასრულებს ენების ცენტრი თავის მოვალეობას? რა არის გასაუმჯობესებელი?

- ზოგადად, ენების სწავლება აუცილებელია და ამაზე არაერთხელ გვქონდა საუბარი.

საქმე ისაა, რომ სხვადასხვა მხრიდან სხვადასხვა ინფორმაცია მოდის: არსებობს სტუდენტების ნაწილი, რომლებიც უკმაყოფილონი არიან უცხო ენების სწავლების იმ დონით, რაც უნივერსიტეტშია და არსებობს სტუდენტთა ის ჯგუფიც, რომელიც კმაყოფილია. სწავლების ხარისხი, იდეაში, ცალსახად გასაუმჯობესებელია და ამას არ სჭირდება დიდი სჯა-ბაასი, თუმცა, როგორ და რა საშუალებებით, ამაზე, უპრიანი იქნება, რომ ენების ცენტრი ჩამოყალიბდეს. მას, ალბათ, ექნება თავისი პოზიცია, რადგან, როგორც ვიცი, დიდი ხნის განმავლობაში ამუშავებდნენ კონცეფციას - თუ როგორ უნდა გააქტიურდეს სწავლება და როგორ მივაღწიოთ უკეთეს შედეგს. 

- რამდენადაც ჩვენთვის ცნობილია, გერმანიის უნივერსიტეტმა თსუ-ს აკადემიური ბაზის გამართულობისთვის სპეციალური პროგრამა აჩუქა, რომელიც არ ამუშავებულა. ხომ არ არის დაგეგმილი კონკრეტული ღონისძიებები სასწავლო პროცესის მართვის ბაზების მუშაობის გასაუმჯობესებლად?

- ეს პროგრამა ნამდვილად არსებობდა და მას ერქვა NOA, რომელიც მიუნხენის ტექნიკური უნივერსიტეტის საჩუქარი იყო (უკვე 6 წელი გავიდა მას შემდეგ, რაც ეს პროგრამა გვაჩუქეს). საერთაშორისო ორგანიზაციების მიერ გამოყოფილი საკმაოდ სოლიდური თანხა მოხმარდა ამ პროგრამის ადაპტირებას, რათა ეს პროგრამა ქართულ რეალობას მორგებოდა. 2011 წელს ეს ბაზა გასაშვებად მზად იყო, თუმცა არ ამუშავებულა, რაც ძალიან ცუდია.

ამ ეტაპზე ორ თემას გამოვყოფ: ერთია ის, რომ თვითონ ბიუროკრატიული საქმის წარმოება, რომელიც მიმდინარეობს ადმინისტრაციაში, არ არის დაფუძნებული არც ერთ კომპიუტერულ პროგრამაზე. ჩვენ ძალიან ინტენსიურად ვმუშაობთ ფინანსთა სამინისტროსთან. მან კარგი საჩუქარი გაგვიკეთა - უფასოდ გვაძლევს სისტემას, რომელიც მოაწესრიგებს დოკუმენტბრუნვას ადმინისტრაციაში, რაც თავისთავად კარგი საქმეა. პარალელურად, ჩვენ საკმაოდ დიდი ხანი დაგვჭირდა, რომ გვენახა, სად იყო მიუნხენის უნივერსიტეტის მიერ ნაჩუქარი პროგრამა. იგი ახლა ნაპოვნია და გადავეცით ჩვენს პარტნიორებს ფინანსთა სამინისტროში, რომლებიც შეაფასებენ დღევანდელ მდგომარეობას და იმას, თუ რამდენად შეიძლება ამ ორმა პროგრამამ პარალელურად იმუშაოს. თუ ეს შედგება, ანუ ადმინისტრაციული საქმის წარმოება თუ მიებმება სტუდენტური საქმის წარმოებას და ბაზებს, კარგ შედეგს მივიღებთ. კიდევ ერთხელ ვიმეორებ, რომ, სამწუხაროდ, 2011 წელს არ მოხდა ამ პროგრამის უნივერსიტეტის სივცეში ამუშავება. ეს პროდუქტი ახლა Mიცროსოფტ-მა იყიდა, მაგრამ, როგორც ჩვენმა პარტნიორებმა გვაცნობეს, ვინაიდან ის უკვე ნაჩუქარია, თანხის გადახდა აღარ მოგვიწევს. ახლა ვადგენთ, თუ რამდენად თავსებადია ეს ორი სისტემა და რამდენად შეიძლება მისი განახლება. 

აუცილებელია, რომ სასწავლო პროცესის მართვის ბაზები გაიმართოს და ადვილი სამართავი იყოს არა მხოლოდ მომხმარებლისთვის, არამედ მათთვისაც, ვინც ამ ბაზებზე მუშაობს, ვთქვათ, იგივე, ადმინისტრაციის თანამშრომლებისთვის. ამით ბიუროკრატია შემცირდება, გაიზრდება სისწრაფე, რაც ძალიან საგრძნობი იქნება მომხმარებლისთვის. 

- თქვენ განაცხადეთ, რომ უნდა შეიქმნას ომბუდსმენის ინსტიტუტი სტუდენტებთან ურთიერთობისთვის. როდიდან აპირებთ ამ ინსტიტუტის ამუშავებას და არის თუ არა უკვე განსაზღვრული, როგორ დაკომპლექტდება და რა ფუნქციები ექნება მას?

- აუცილებელია, რომ შეიქმნას ჯგუფი, რომელშიც შევლენ პროფესორები. ეს უნდა იყოს ნდობის ჯგუფი, რომელსაც ჩვენ ვთხოვთ, რომ ჩამოაყალიბონ ხედვა, თუ რა უნდა იყოს ფუნქციონალი და შინაარსი იმ საქმიანობისა, რაც სტუდენტურმა ომბუდსმენმა უნდა გააკეთოს. მათ უნდა შეიმუშაონ სამუშაოების აღწერილობები; უნდა მოიფიქრონ - ვინ უნდა იყოს ეს ადამიანი - ფსიქოლოგი, კონფლიქტოლოგი თუ იურისტი; როგორი ბეგრაუნდი, განათლება, გამოცდილება და პიროვნული თვისებები უნდა ჰქონდეს მას. ჩვენ ვვარაუდობთ, რომ იმ კომისიაში, რომელიც ღია კონკურსის წესით შეარჩევს სტუდენტურ ომბუდსმენს, ყველა დაინტერესებული მხარე იქნება წარმოდგენილი. მას ექნება მედიატორის როლი ადმინისტრაციასა და სტუდენტებს, სტუდენტურ ჯგუფებს, ან პროფესორსა და სტუდენტს შორის. მისი გადასაწყვეტი იქნება ნებისმიერი საკითხი, რომელიც შეიძლება გადაიჭრას მარტივად და სწრაფად, რათა გამოვლენილი პრობლემა არ გადაიზარდოს კონფლიქტში. ეს იქნება საუკეთესო ინსტიტუტი, სადაც მოხდება პოზიციების შეჯერება/დაახლოება. საერთოდაც, უნდა აღდგეს დიალოგის ფორმით კომუნიკაციის კულტურა და ამ დიალოგის ფასილიტატორი იქნება ომბუდსმენი, რომელსაც ესმის - რა არის აკადემიური სივრცე, მართავს ამ სივრცეს და, კანონიდან გამომდინარე, საზღვრავს, თუ როგორ შეიძლება ურთიერთობების დალაგება. 

- რამდენადაც ჩვენთვის ცნობილია შეიქმნება ცალკე კომისიაც, რომელიც სტუდენტურ პროექტებს განიხილავს... 

- ვინაიდან არსებობს პრეტენზიები, რომ წარსულში სტუდენტურ პროექტებზე თანხები არასწორად იქნა გამოყენებული, ყველანი შევთანხმდით, რომ ასეთი რამ აღარ უნდა განმეორდეს. აუცილებელია, არსებობდეს ტრანსფარანტული, გამჭვირვალე მექანიზმი იმისა, თუ როგორ ნაწილდება ის თანხები, რომლებიც მიემართება სტუდენტური ცხოვრების გასაუმჯობესებლად. სტუდენტური სამეცნიერო პროექტების ან, ვთქვათ, ალპინიადის, კონცერტის ან რაიმე სხვა სახის ღონისძიებებისა თუ აქტივობების დაფინანსებისთვის აუცილებელია არსებობდეს კომისია, რომლის მუშაობის წესიც გასაგები იქნება ყველასთვის. კერძოდ, პროექტის ავტორებმა უნდა იცოდნენ, როგორ და რა პრინციპებზე დაყრდნობით იღებს კომისია გადაწყვეტილებას; რა არის მოთხოვნა; როგორი პროექტი უნდა შემოვიდეს; როგორ უნდა იყოს ის შესრულებული და ა.შ. ეს არის ჩვეულებრივი რუტინული სამუშაო, რომელიც აუცილებლად იყო გასაკეთებელი და, სამწუხაროდ, არ კეთდებოდა. რადგან დაისვა ამდენი შეკითხვა, უკეთესია, ამ კომისიაში შედიოდნენ წევრები, რომლებიც რომელიმე სტუდენტურ მხარესთან დაკავშირებულნი არ არიან. შეიძლება ეს იყოს არასამთავრობო ორგანიზაციის, ანაც საერთაშორისო ორგანიზაციების წარმომადგენლები, ვინც მონაწილეობას მიიღებს ამ საგრანტო კომისიის მუშაობაში, რაც მიღებულია და კარგი პრაქტიკაა. თუ რაღაც კითხვითი ნიშნები გაჩნდება, იქნება იმის საშუალება, რომ მიმართონ კომისიას, რომელიც ადეკვატურ, გასაგებ პასუხებს გასცემს. ანუ, ეს არის ის საკითხი, რომელიც აუცილებელად უნდა იყოს მუდმივად ცხარე დებატების საგანი. ვიმეორებ, რადგან დაისვა ასეთი კითხვები, მოდით, გავაკეთოთ ისე, რომ აღარ გაჩნდეს შეკითხვები - თვითონ პროცედურა იყოს გასაგები, გამჭვირვალე და სანდო.

ესაუბრა

ნინო კაკულია

ვრცლად

პასუხისმგებლობას, ჩემი კომპეტენციის ფარგლებში, არ გავურბივარ!

ინტერვიუ თსუ-ის რექტორთან, აკადემიკოს ლადო პაპავასთან

 - ბატონო ლადო, რამდენადაც ჩვენთვის ცნობილია, ამჟამად უნივერსიტეტში პოლიციის შემოსვლას აპროტესტებენ სტუდენტები, რასაც ზოგიერთმა პროფესორ-მასწავლებელმაც მხარი დაუჭირა. თქვენ მოუწოდეთ პატრულის თანამშრომლებს, რომ დაეტოვებინათ შენობა. ვინ „დაპატიჟა“ პოლიცია უნივერსიტეტში? 

- ნამდვილად არ მაქვს ეს ინფორმაცია. საერთოდ, მიღებული იყო გადაწყვეტილება, რომ გარე პერიმეტრზე და არა უნივერსიტეტში, თუნდაც ეზოში შეიძლება ყოფილიყვნენ პოლიციელები, რათა რაიმე ექსცესი არ მომხდარიყო. ეს არის ჩვეულებრივი უსაფრთხოების დაცვის ზომები, მაგრამ მათი მობილიზება უნივერსიტეტის ეზოში და მით უფრო უნივერსიტეტის შენობაში არავითარ შემთხვევაში არ ყოფილა შეთანხმებული. ხოლო როგორ მოხდა მათი აქ შემოსვლა, ამაზე ვერაფერს გეტყვით. თქვენ ნახეთ, რა რეაქცია ჰქონდათ ჩვენს პროფესორებს, როდესაც პოლიციამ უნივერსიტეტის პირველი კორპუსის შენობა, რექტორატის დერეფანი დაიკავა. ეს იყო სავსებით ჯანსაღი რეაქცია, რომ პოლიციის გაჩერება უნივერსიტეტში არ შეიძლებოდა და რექტორის ადგილიც სწორედ იქ იყო, სადაც იდგნენ უნივერსიტეტის პროფესორები. 

- კანცლერობის პირველ კანდიდატს სოსო არჩვაძეს ვინ აუგორა საინფორმაციო კამპანია, რის შემდეგაც მან მოხსნა თავისი კანდიდატურა? სტუდენტური თვითმმართველობის წევრები იღებდნენ ამაში მონაწილეობას? 

- ვერავის დავაბრალებ - ვინ აუგორა არჩვაძეს კამპანია, მაგრამ, სინამდვილეში, არჩვაძის წინააღმდეგ რომ ბინძური კამპანია აგორდა, ფაქტია. მიუხედავად იმისა, რომ ამ კაცმა არა ერთი ღირსეული განცხადება გააკეთა, კაცს, რომელმაც სახლ-კარი დაკარგა სოხუმში და არის იძულებით გადაადგილებული პირი, ლამის რუსეთის აგენტობა დასწამეს. 

- პროტესტანტები, რომლებიც აქციებზე კანცლერობის მეორედ შერჩეული კანდიდატისგან გიორგი გაფრინდაშვილისგან კანდიდატურის მოხსნას ითხოვენ, გაფრინდაშვილს ბრალს დებენ, რომ წარსულში სტუდენტური თვითმმართველობის ხელმძღვანელი პირების მხრიდან სტუდენტების ცემის ფაქტებს ხელს აფარებდა. დღევანდელი სტუდენტური თვითმმართველობის წარმომადგენლები აცხადებენ, რომ ბრალდებას დადასტურება უნდა. წარსულის გამო, ზოგადად, უნდა აგოს თუ არა პასუხი გიორგი გაფრინდაშვილმა? 

- საერთოდ, მომხრე ვარ უდანაშაულობის პრეზუმფციის, მაგრამ არის მომენტი, როდესაც ადამიანი მიდის მაღალ საჯარო თანამდებობაზე (და უნივერსიტეტის კანცლერობა საკმაოდ მაღალი თანამდებობაა), დიდი მნიშვნელობა აქვს იმას, რომ კონსესუსი მაქსიმალურად იქნას მიღწეული უნივერსიტეტის ყველა ძალას შორის და არ იყოს განხეთქილება. ამიტომ ერთია - რა დაუმტკიცდება და რა არა ბატონ გიორგი გაფრინდაშვილს და მეორეა - მისი კანდიდატურა როგორ აღიქმება საუნივერსიტეტო საზოგადოების მიერ. 

- საქართველოს უსაფრთხოების სამსახურმა განაცხადა, რომ ივა კავსაძე არ არის „ოდეერი”, თქვენ კი საპირისპიროს აცხადებთ...

- მე დავეთანხმე სტუდენტებს, რადგან მთელმა უნივერსიტეტმა იცის - სტუდენტებიდან დაწყებული პროფესორებით დამთავრებული ამის შესახებ. როცა სტუდენტები ამას საჯაროდ აცხადებენ და იქ დამსწრემ, თითქმის ყველამ იცის ეს ამბავი, რა? ტყუილი უნდა მეთქვა? იგი არის კანცლერის თანაშემწე, რომელიც ჩემი რექტორობის პერიოდში დაინიშნა. 

- იგი „ოდეერის” წარმომადგენელი იყო თქვენამდეც?

- ბატონი ჩომახიძის თანაშემწე ყოველთვის იყო ერთი პირი, მაგრამ კონკრეტულად რა ფუნქცია ჰქონდა დაკისრებული, ამას ვერ ვიტყვი. რაც შეეხება კონკრეტულ პიროვნებას, რომელზედაც იყო საჯაროდ ნათქვამი და ეს იცოდა, რეალურად, მთელმა საუნივერსიტეტო საზოგადოებამ, მასზე გავრცელებული ინფორმაცია ფაქტია. რექტორი ვერ იტყოდა ტყუილს. 

- არსებობს ასეთი აზრი, რომ რექტორმა თავის დროზე რატომ არ განაცხადა „ოდეერის” შესახებ და რატომ დაუკავშირა ამის აღიარება გაფრინდაშვილის კანდიდატურის მოხსნა-არმოხსნის საკითხს?

- „ოდეერის” საკითხი ყველაზე მკაფიოდ ჩამოყალიბდა მაშინ, როდესაც გართულდა და გამწვავდა ვითარება. როდესაც მთელი უნივერსიტეტის პროფესორებმა და სტუდენტებმა ამ თემაზე დაიწყეს კონკრეტულად საუბარი, მაშინ მომიწია მეც ამ კითხვებზე პასუხის გაცემა. მე სხვა პირებზეც დამისვეს შეკითხვა - არიან თუ არა ისინი „ოდეერები”, მაგრამ არც ერთ მათგანზე რაიმე ინფორმაცია არ მაქვს. 

- რატომ არ ჰქონდა რეაგირება რექტორს, თუკი იცოდა, რომ უნივერსიტეტში „ოდეერი” იყო? - ასე სვამენ სტუდენტური თვითმმართველობის წარმომადგენლები კითხვას...

- აქამდე მისი საქმიანობა არ იყო გასაჯაროებული და იგი არ მონაწილეობდა საუნივერსიტეტო საკითხების გადაწყვეტაში. ხოლო, როდესაც მთელმა უნივერსიტეტმა დაიწყო მასზე საუბარი, ბუნებრივია, ვერც რექტორი გაჩუმდებოდა ამ თემაზე. 

- რატომ დადის მოარული ხმები მოცემულ სიტუაციაში რექტორის იმპიჩმენტის თემაზე?

- ეს საუბრები დაიწყო სხვაგვარად: რომ, რადგან რექტორი ვერ არეგულირებს საკითხებს, ამიტომ მოეწყოს რექტორის იმპიჩმენტი. 

- ეს შეესაბამება სინამდვილეს?

- ეს ხმები ჩემამდეც მოვიდა, თუმცა ოფიციალურად პროცესი არ არის დაწყებული.

- მაგრამ გაქვთ ვარაუდი, რომ ამ თემაზე დაიწყება საუბარი, თუნდაც აკადემიურ საბჭოში?

- ამ ეტაპზე ვერაფერს გეტყვით. 

- აკადემიური საბჭო თუ წამოწევს ამ საკითხს? - ამაზეა საუბარი...

- რექტორის იმპიჩმენტის საკითხი - ეს არის აკადემიური საბჭოს პრეროგატივა და აკადემიური საბჭოს შემადგენლობის ერთ მესამედს შეუძლია დააყენოს რექტორის იმპიჩმენტის საკითხი, ანუ ამისთვის საჭიროა 5 ხმა. მაგრამ ამაზე დღეს ვერაფერს ვიტყვი მკაფიოდ, რადგანაც ოფიციალურად ეს პროცედურა არ დაწყებულა. 

- ეს საკითხი გარკვეულ არეულობასაც შემოიტანს უნივერსიტეტში...

- ვფიქრობ, რომ იმპიჩმენტი რომ გატარდეს, უნივერსიტეტი კიდევ უფრო სერიოზულად დაზარალდება. თავადაც შემიძლია მივიღო ობიექტური გადაწყვეტილება - თუ ეს არ შეუშლის ხელს უნივერსიტეტს და არ გააფუჭებს საერთო საქმეს, რასაც უნივერსიტეტის იდეა ჰქვია.

- თქვენი აზრით, რას ნიშნავს, რომ აქციების ფონზე უნივერსიტეტში შექმნილ ვითარებაზე მთელი პასუხისმგებლობა თქვენ გეკისრებათ? - ამაზე კვლავ სტუდენტური თვითმმართველობის წარმომადგენლები საუბრობენ...

- პასუხისმგებლობას ჩემი კომპეტენციის ფარგლებში, რა თქმა უნდა, არ გავურბივარ... რექტორი ვარ და მზად ვარ, თითოეულ კითხვას გავცე პასუხი.

ვრცლად

რექტორის ჩანაფიქრები ახალი 2016 წლისთვის

ინტერვიუ თსუ-ის რექტორთან, აკადემიკოს ლადო პაპავასთან

- რას ჩათვლით 2015 წლის მოვლენად უნივერსიტეტში?

- ჩემი აზრით, უნივერსიტეტში მნიშვნელოვანი იყო ის, რომ სტუდენტების მონაწილეობით პირველად ამოქმედდა სამეცნიერო-კვლევითი პროგრამები. უფრო კონკრეტულად რომ ვთქვათ, 220 სტუდენტი ჩაება საუნივერსიტეტო სამეცნიერო-კვლევით საქმიანობაში უნივერსიტეტის ბიუჯეტიდან გამოყოფილი 525 000 ლარის გამოყენებით, რაც, პრაქტიკულად, პირველი შემთხვევაა უნივერსიტეტში. ეს იგივეა, რაც საგრანტო პროექტი. ამ პროექტს მომავალშიც აუცილებლად გავაგრძელებთ და სტუდენტთა მონაწილეობის ფორმებსა თუ მასთან დაკავშირებულ პროცესს დავხვეწთ, თუკი ამ წელს რაიმე ხარვეზი გამოიკვეთა. 

- ძალიან კარგი ფაქტია, რომ ინფორმაციის თავისუფლების განვითარების ინსტიტუტი (IDFI) და ფონდი „ღია საზოგადოება - საქართველო“ გიწვევთ 2010-2015 წლებში საქართველოში ინფორმაციის თავისუფლების მდგომარეობის შემაჯამებელი ანგარიშის პრეზენტაციაზე, სადაც თსუ-ს გადაეცემა სპეციალური ჯილდო „2015 წელს საჯარო ინფორმაციის ხელმისაწვდომობის უზრუნველყოფისთვის“. რამდენადაც ჩვენთვის ცნობილია, საჯარო ინფორმაციის გამჭვირვალობის კუთხით ადრე უნივერსიტეტი ბოლო ადგილზე იყო. რა შეიცვალა ამ უმოკლეს პერიოდში? 

- ეს იყო ერთ-ერთი უმთავრესი ამოცანა იმ დღიდან, რაც პატივი მერგო და ამირჩიეს უნივერსიტეტის რექტორად, რადგან ჩემი პოსტზე არჩევიდან 2 კვირის თავზე უნივერსიტეტმა მიიღო სერტიფიკატი, რომელსაც ეხატა დიდი შავი ბოქლომი იმის დასტურად, რომ თსუ ინფორმაციის გამჭვირვალობის კუთხით ბოლო ადგილზე იყო, ანუ ჩვენ დავსახელდით ყველაზე გაუმჭვირვალე ორგანიზაციად. ერთი წლის თავზე უნივერსიტეტმა სერიოზული პროგრესი განიცადა და ,,გამჭვირვალობის რეიტინგში” ვიყავით მესამე 89%-ით. შემდეგ უკვე ამოცანად დავისახეთ პირველობა, რადგან არ შეიძლება ასეთი ისტორიისა და მასშტაბების მქონე პირველი ქართული უნივერსიტეტი 100%-ით არ ყოფილიყო ,,გამჭვირვალე”. ჩვენთვის მთავარი არის არა ის, რომ ვიყოთ პირველები, არამედ მთავარია, რომ უნივერსიტეტი იყოს 100%-იანი საჯარო ინფორმაციის გამჭვირვალობის თვალსაზრისით. ამ უმაღლეს პროცენტს, წელს, უკვე ადმინისტრაციის სრული მობილიზებით მივაღწიეთ. თურმე შესაძლებელი ყოფილა ამის მიღწევა და, ბუნებრივია, რომ ეს სტანდარტი უნივერსიტეტში უნდა დავამკვიდროთ, რათა ყოველწლიურად ვიყოთ 100%-იანად გამჭვირვალე. ეს არის ჩემი, როგორც რექტორის, ამოცანა და მიხარია, რომ ამას სრულიად იზიარებს ადმინისტრაციაც. 

- თქვენ თავს არიდებთ ხოლმე პასუხს, მაგრამ ეგებ მაინც დაგვისახელოთ, ვინ მიგაჩნიათ წლის პერსონად უნივერსიტეტში?

- წლის პერსონად ბევრი გამორჩეული ადამიანი შეიძლება დასახელდეს, როგორც უფროსი თაობის წარმომადგენელი, ასევე, ახალგაზრდები, სტუდენტები... მაგალითად, ივანე ჯავახიშვილის ხსოვნისადმი მიძღვნილი სამეცნიერო ფორუმი საკმაოდ წარმატებით მუშაობს. ამ ფორუმმა არა ერთი წარჩინებული გამოავლინა და ისინი საკმაოდ პერსპექტიულები არიან. წელს პირველად მივიღეთ პოსტდოქტორანტურაში ახალგაზრდა მეცნიერები, რომელთაც დისერტაციები ახლახან დაიცვეს. წელს ისევ გვაქვს მიღება და 2016 წლის დასაწყისში უკვე ახალი 7 პოსტდოქტორანტი გვეყოლება. ყველანი ესენი განა წლის პერსონები არ არიან? მიუხედავად ამისა, 2015 წლის ყველაზე გამორჩეულ უნივერსიტეტელად, ჩემი აზრით, პროფესორი ვახტანგ ლიჩელი უნდა ჩაითვალოს უნიკალური არქეოლოგიური აღმოჩენისთვის!

ჩემთვის მთავარია, რომ უნივერსიტეტი სწორ გზაზე დგას და ეს რომ ასეა, დადასტურდა რეიტინგებითაც. საერთოდ ყველა რეიტინგი პირობითია და მის მიმართ ყოველთვის სკეპტიკურად ვიყავი და ვარ განწყობილი, მაგრამ როცა საუნივერსიტეტო სივრცეში ხარ, ბუნებრივია, რეიტინგების ის სისტემაც უნდა გაიზიარო, რასაც მთელი მსოფლიო იყენებს საუნივერსიტეტო საქმიანობაში.

WEBOMETRICS-ის რანჟირებით თსუ შედის მსოფლიო საუკეთესო უნივერსიტეტთა 5%-ში, ანუ ფანტასტიური ნახტომი გავაკეთეთ. თუ მარტში 2006-ე ვიყავით მსოფლიოში, ახლა ვართ 830-ე - ეს არის ძალიან სერიოზული წინსვლა. გარდა ამისა, აკადემიურ რეიტინგებში მსოფლიოში ვართ 985-ე ისევ 1000-ში. პირველად გამოჩნდა ჩვენი უნივერსიტეტი ტომსონის რეიტინგშიც. ისინი, როგორც წესი, ძალიან მოკლე სიას აქვეყნებენ და, მართალია, 750 საუკეთესო უნივერსიტეტს შორის არ მოვხვდით, მაგრამ ტომსონმა, გარდა ამ 750 უნივერსიტეტის რეიტინგისა, გამოაქვეყნა, აგრეთვე, დარგობრივი რეიტინგებიც. მაგალითად, აღმოჩნდა, რომ ფიზიკაში ჩვენი უნივერსიტეტის სამეცნიერო დონე მსოფლიოს 248 საუკეთესო უნივერსიტეტში არის 187-ე, ანუ ესეც უნივერსიტეტის წარმატების მახასიათებელია, თუმცა ეს არ არის გრანდიოზული გამარჯვება, რომ ამით ჩვენ ვიამაყოთ. უბრალოდ, ამას იმ ნიშნით ვაფასებ, რომ უნივერსიტეტი, ამ თვალსაზრისით, სწორ გზაზე დგას. 

- რა გაკეთდა და რა ვერ გაკეთდა ამ წელს, რა პროგრამაც თქვენ გქონდათ?

- მთელი ჩემი რექტორობის მანძილზე მთავარ მიზნად მივიჩნევ უნივერსიტეტის პირდაპირი საბიუჯეტო დაფინანსების მიღწევას. ამ კუთხით, სამწუხაროდ, ვერც 2015 წელს მივაღწიე წარმატებას – ვერ მოვახერხე, რომ საუნივერსიტეტო დაფინანსების სისტემაში გაჩენილიყო პირდაპირი საბიუჯეტო დაფინანსება. რექტორი ვიქნები თუ არა, ამ პრობლემას მუდამ შევეხები, რადგან არ შეიძლება - უნივერსიტეტები მხოლოდ სტუდენტებზე მიბმული ფულით არსებობდნენ. ეს არის მცდარი მოდელი. და კიდევ, მე მხოლოდ ჩვენს უნივერსიტეტზე კი არ მაქვს საუბარი, არამედ, ზოგადად, სახელმწიფო უმაღლეს სასწავლებლებზე.

- თქვენი მხრიდან ამ საკითხზე პრინციპულობამ მთავრობაში განაწყენებული ხალხი ხომ არ შეგძინათ?

- რა თქმა უნდა, არის პოლიტიკოსთა ჯგუფი, ვისაც ეს არ მოწონს. ეს მათი პრობლემაა - ვიღაც მოწონდეთ, ვიღაც არა, ისევე, როგორც ჩემი პრეროგატივაც არის - ვიღაც მომწონდეს და ვიღაც არა, თუმცა, ამ მოცემულობის ფონზე, ჩემს შეხედულებებს, პოზიციას ვერ ვუღალატებ. დარწმუნებული ვარ, რომ, ადრე თუ გვიან, ქვეყანა მივა იმ გადაწყვეტილებამდე, რომ უნივერსიტეტებს საბაზისო დაფინანსება გამოუყოს და, ალბათ, ჩვენს სახელმწიფოს ოდესმე ის პოლიტიკური ელიტაც ეყოლება, რომელიც მიხვდება, რომ ეს გასაკეთებელია.

- წელს ყველაზე მასშტაბური საპროტესტო აქცია სტუდენტურმა თვითმმართველობამ მოაწყო. თემები, რომლებიც მათ წამოწიეს, ყველასთვის ნაცნობია, რადგან წლების მანძილზე ამავე საკითხებს სხვა სტუდენტური ჯგუფებიც სვამდნენ აქციებზე. მათი მოთხოვნები რამდენად გაითვალისწინა უნივერსიტეტმა?

- ნუ ვიტყვით, რომ აკადემიური რეგისტრაციის პრობლემაზე მუშაობა ახლა უნდა დავიწყოთ. თქვენ, ალბათ, გახსოვთ, რომ 2014-2015 სასწავლო წელი დავიწყეთ ყოველგვარი აქციების გარეშე. საგაზაფხულო სემესტრებიც ისე დაიწყო მაშინ, რომ ფაკულტეტები ახერხებდნენ აკადემიური რეგისტრაციის უხმაუროდ გავლას. ჩვენ IT დეპარტამენტის ტექნიკური გადაიარაღება მოვახერხეთ, მაგრამ ახლა ისევ იჩინა პრობლემებმა თავი. ამიტომ უნდა გავმიჯნოთ - რა არის პრობლემა, რომელიც დაკავშირებულია IT ტექნოლოგიებთან და რა არის პრობლემა, რომელიც დაკავშირებულია ამა თუ იმ ფაკულტეტის ხელმძღვანელობის ცუდ მუშაობასთან. ვფიქრობ, ამჟამად რა პრობლემაც იყო, ეს უფრო ცალკეული ფაკულტეტების გაუმართავი მუშაობის შედეგი გახლდათ. რა თქმა უნდა, ამ მიმართულებითაც მიმდინარეობს უკვე მუშაობა.
რაც შეეხება სახელმძღვანელოების თარგმნას, გეტყვით იმას, რომ დიდ შეცდომად მიმაჩნია ჩვენი კრიტიკა იმასთან დაკავშირებით, რომ თითქოს ჩვენი არჩეული კურსი არ არის სწორი; რომ სახელმძღვანელოები კი არ უნდა ითარგმნებოდეს, არამედ უკეთესად ვასწავლოთ ინგლისური. ინგლისური, რა თქმა უნდა, უკეთესად უნდა ვასწავლოთ, ეს უალტერნატივოა, მაგრამ თუ წავიკითხავთ საქართველოს კონსტიტუციას, კანონს „სახელმწიფო ენის შესახებ“ და კანონს „უმაღლესი განათლების შესახებ“, ეჭვი აღარ შეგვეპარება იმაში, რომ ქართულ საგანმანათლებლო პროგრამებზე სტუდენტები უნდა უზრუნველვყოთ ძირითადად ქართულ ენაზე შექმნილი სახელმძღვანელოებით. ჩვენი ორიენტაცია ასეთია - ყველა სახელმძღვანელოს ვერ ვთარგმნით, მაგრამ უნდა ითარგმნოს წამყვანი, ბაზური სახელმძღვანელოები, რომლის ანალოგები საქართველოში, მიზეზთა გამო, უბრალოდ, არ გვაქვს. რაც რექტორი ვარ, უკვე 8 სახელმძღვანელოს პრეზენტაცია გაიმართა. აქედან ერთი სახელმძღვანელოა მხოლოდ ელექტრონულ ფორმატში, რადგან სწორედ ასეთი ტიპის უფლება შეიძინა უნივერსიტეტმა და 7 კი ბეჭდური სახით არის გამოსული. ეს ცოტაა, მაგრამ ამ 8 სახელმძღვანელოს თარგმნის კუთხით, აშკარა ლიდერად გამოიკვეთა ეკონომიკისა და ბიზნესის ფაკულტეტი, რადგან ამ 8-იდან 5 მათი მომზადებულია. სამწუხაროდ, ამ პრობლემის მოსაგვარებლად ზოგიერთი ფაკულტეტი მოიკოჭლებს. ჩვენ შევქმენით ყველა შესაძლებლობა - რომელი სახელმძღვანელოებიც შეარჩიეს ფაკულტეტებმა, ყველას თარგმნის უფლება ვიყიდეთ; ყველა ფაკულტეტს გამოვუყავით თანხები... იყო შემთხვევები, როდესაც, ზოგან, ეს თანხები გაიფლანგა. მივიღეთ ზომები, რომ გამოსწორდეს სიტუაცია. არავის მივცემთ უფლებას, რომ ეს პროგრამა ჩაშალოს. ვიმედოვნებ, რომ ეკონომიკისა და ბიზნესის ფაკულტეტს სხვა ფაკულტეტებიც აუბამენ მხარს.

- რას ჩაუთქვამთ ახალ 2016 წელს?

- 2016 წელი ჩვენთვის არის ძალიან მნიშვნელოვანი, რადგანაც ეს არის საიუბილეო წელი - ივანე ჯავახიშვილის დაბადებიდან სრულდება 140 წელი, ამიტომ სენატზე მივიღებთ გადაწყვეტილებას, რომ ეს წელი გამოვაცხადოთ ჯავახიშვილის წლად. ჩვენ უნდა შევიმუშაოთ მთელი რიგი ღონისძიებები და, ტრადიციულად, რადგან უკვე მე-3 წელია, ჩავატარებთ ივანე ჯავახიშვილის ხსოვნისადმი მიძღვნილ სამეცნიერო ფორუმს, სადაც მონაწილეობას მიიღებენ პროფესორები და სტუდენტები; გაიცემა ჯავახიშვილის საერთაშორისო პრემია ქართველოლოგიაში; ასევე, გვექნება სხვა ღონისძიებებიც, კონფერენციები, შესაბამისად, მიძღვნილი ჯავახიშვილისადმი და ეს აქტიურობა გაგრძელდება მთელი წლის განმავლობაში.
და კიდევ, შემდეგი წელი ქვეყნისთვის არის პოლიტიკური არჩევნების წელი და დარწმუნებული ვარ, რომ არც ერთი პოლიტიკოსი არ მოინდომებს უნივერსიტეტი ჩააბას პოლიტიკურ თამაშებში. დარწმუნებული ვარ, რომ უნივერსიტეტის ჯანსაღ ძალებს - პროფესორები იქნებიან ისინი თუ სტუდენტები, ისევე, როგორც ჩვენს პოლიტიკურ ჯანსაღ ძალებს, ეყოფათ გონიერება, რომ იმ დაწესებულებას, სადაც მათი შვილები და შვილიშვილები სწავლობენ, არ შეექმნას პრობლემები და სასწავლო თუ სამეცნიერო პროცესი წარმატებით გაგრძელდეს. 
კიდევ ერთი მომენტი, რაც ასევე მნიშვნელოვანია - გაისად გვიწევს პროგრამების აკრედიტაციის პროცესი, უნდა მოვემზადოთ ავტორიზაციისთვის, რომელიც, სავარაუდოდ, 2017 წელს იქნება, ანუ გასატარებელი გვექნება მთელი რიგი ისეთი ღონისძიებები, რომელიც ამ ოფიციალური პროცედურების წარმატებით გადალახვას შეგვაძლებინებს.

ვრცლად

რექტორის მორიგი შეხვედრა სტუდენტებთან

თსუ-ის რექტორთან სტუდენტების მორიგი შეხვედრა 29 სექტემბერს სააქტო დარბაზში გაიმართა. სტუდენტების ყველა კითხვას, რომელიც სასწავლო პროცესთან დაკავშირებულ პრობლემებს ეხებოდა, აკადემიკოსმა ლადო პაპავამ, ფაკულტეტების დეკანებმა და დეპარტამენტების ხელმძღვანელებმა უპასუხეს. შეხვედრა, დაახლოებით, ორი საათის განმავლობაში გრძელდებოდა. განიმარტა თსუ-ის კორპუსების გარემონტების სირთულეები, ისაუბრეს ემერიტუსი პროფესორების საკითხთან დაკავშირებით და პირველად გახმიანდა ინფორმაცია სპეციალური კომისიის შექმნის შესახებ, რომელიც სტუდენტთა მომსახურების ცენტრების რეფორმირებაზე იმუშავებს. თსუ-ის ადმინისტრაცია რეფორმის შედეგად ბიუროკრატიული ბარიერების მოხსნასა და სტუდენტების მიმართ დამოკიდებულების გაუმჯობესებას პროგნოზირებს.

ვითარება სოციალურ და პოლიტიკურ მეცნიერებათა ფაკულტეტზე

შეხვედრაზე ყველაზე მეტი შეკითხვა თსუ-ის სოციალურ და პოლიტიკურ მეცნიერებათა ფაკულტეტის სტუდენტებმა დასვეს. მათ შორის გახლდათ კითხვები აკადემიური რეგისტრაციის პროცესში წამოჭრილ პრობლემებთან დაკავშირებით. ამის შესახებ თსუ-ის რექტორმა ვლადიმერ პაპავამაც ისაუბრა და გაახმიანა ერთ-ერთი სტუდენტის მიერ მიწერილი წერილი, რომელიც, ასევე, აღნიშნულ საკითხს ეხებოდა: „შაბათს გავიარე აკადემიური რეგისტრაცია და ვიფიქრე, ყველაფერი მოგვარდა. გუშინ ლექციები გაგვიცდა, დღეს ფაკულტეტმა ახალი ცხრილები გამოაქვეყნა, რომლის მიხედვით ბევრი რამ შეიცვალა. ბაზაში მონაცემები დაუზუსტებელი იყო“.

„ორი წელია თსუ-ში ვსწავლობ და არასდროს შემქმნია ის პრობლემები, რომელიც ამ სემესტრში საგნების არჩევისას შემხვდა. ჩვენს კურსზე დაახლოებით 85 სტუდენტია, ერთერთ სავალდებულო საგანზე კი მხოლოდ 15 ადგილი გახლდათ გამოყოფილი. მაინტერესებს როგორ ავირჩიოთ ეს საგანი ამდენმა სტუდენტმა? როდესაც სპეციალისტებს მივმართე დახმარებისთვის, მითხრეს, რომ მომდევნო სემესტრში შევძლებთ გავლას. საგანს „ახალი მედია“ ჰქვია და მეექვსე კორპუსში კომპიუტერების აუდიტორიაში ტარდება. ასევე, აკადემიური რეგისტრაციის პროცესში საგნები ძალიან ნელა იხსნებოდა“, - აღნიშნა სოციალურ და პოლიტიკურ მეცნიერებათა ფაკულტეტის სტუდენტმა მარიამ გვარამიამ.

აკადემიური რეგისტრაციისას შექმნი-ლი პრობლემების შესახებ სტუდენტებს სოციალურ და პოლიტიკურ მეცნიერებათა ფაკულტეტის დეკანმა თამარ დოლბაიამ და საინფორმაციო ტექნოლოგიების უფროსმა ტარიელ ზარანდიამ უპასუხეს.

„სასწავლო პროგრამაში დამტკიცებული არ იყო ზოგიერთი ის საგანი, რომელიც სასწავლო ბაზაში გამოჩნდა. დღეს-ხვალ ეს საკითხები დაზუსტდება. ასევე ჩვენი ფაკულტეტი რესურსების მხრივ შეზღუდულია. დამოკიდებულები ვართ სხვა ფაკულტეტებზე გამოთავისუფლებულ აუდიტორიებზე. ამ მხრივაც შეიცვალა ვითარება, რამაც ცხრილებში გარკვეული ცვლილება გამოიწვია. რაც შეეხება ლექციების გაცდენას, მონიტორინგის სამსახურს ვესაუბრეთ და ყურადღება გაძლიერდება. უშუალოდ სასწავლო ბაზასთან დაკავშირებულ საკითხზე საინფორმაციო ტექნოლოგიების დეპარტამენტის უფროსი გიპასუხებთ.

საგნის „ახალი მედიის” შემთხვევაში შესაძლებელია 2 ან 3 პარალელური ჯგუფის გახსნაც. აუცილებელია, ასეთ დროს სტუდენტებმა დროულად მოგვმართონ“, - განაცხადა სოციალურ და პოლიტიკურ მეცნიერებათა ფაკულტეტის დეკანმა თამარ დოლბაიამ.

„ახალ სასწავლო ბაზაზე გადავედით, სადაც ფუნდამენტური მნიშვნელობა აქვს დამტკიცებულ კურიკულუმთან იდენტურობას. ბაზაში შეუძლებელია უკვე დაგეგმილი ცხრილის ცვლილება. ვიცით, რომ ახალ ბაზას მცირე ხარვეზები აქვს, რამდენიმე მიმართულების ჯგუფს შეექმნა პრობლემა, მაგრამ ხარვეზები უკვე გამოსწორებულია. ვგეგმავთ, ბაკალავრიატში ამ პროგრამით გავაგრძელოთ მუშაობა, რადგან აქვს ბევრი უპირატესობა – ფაკულტეტებს, ადმინისტრაციას დაეხმარება სასწავლო პროცესის გამართულად დაგეგმვაში. სტუდენტებს შესაძლებლობა ექნებათ ინფორმაცია გაუმჯობესებულ რეჟიმში მოიძიონ, სასწავლო პროგრამები ერთმანეთს შეადარონ, დაინახონ უკვე გავლილი საგნები რის შესაძლებლობას აძლევთ და რამდენი კრედიტია კიდევ ასაღები. ძალიან ბევრი საინტერესო სიახლე იქნება სტუდენტებისთვის.

რაც შეეხება საგნების ნელა გახსნას, რამდენადაც მივხვდი იგულისხმებოდა გარკვეული საგნების ნელა დადება. ტექნიკური თვალსაზრისით ბაკალავრიატში ხარვეზი არ ყოფილა. პირველ ორ წუთში 7500 საგანი დარეგისტრირდა“, - განაცხადა საინფორმაციო ტექნოლოგიების დეპარტამენტის უფროსმა ტარიელ ზარანდიამ.

თსუ-ის სტუდენტებს, რომლებიც აკადემიურ წელს იღებენ გაცვლით პროგრამებში მონაწილეობისა თუ სხვა მიზეზის გამო, ხშირად უწევთ დამატებითი სასწავლო სემესტრის ან წელის დამატება, რადგან სწავლის გაგრძელების შემდეგ კონკრეტულ სემესტრში ვერ ახერხებენ ზოგიერთი ძირითადი საგნის აღებას, რომელიც სხვა საგნების წინაპირობაა. ეს პრობლემა სოციალურ და პოლიტიკურ მეცნიერებათა ფაკულტეტის სტუდენტმა გიგა აბულაძემ აღნიშნა: „საზღვარგარეთ ვიყავი, რის გამოც ერთი სემესტრი აკადემიური მქონდა აღებული. აქ სწავლა მეორე კურსიდან განვაგრძე. ამ სემესტრში უნდა გამევლო საგანი, თუმცა სასწავლო ბაზაში არ გამიხსნა დასარეგისტრირებლად. როგორც სპეციალისტებმა ამიხსნეს, ამის გამო ერთი სასწავლო წლის დამატება დამჭირდება. დამატებით სემესტრში კი სახელმწიფო დაფინანსება არ გრძელდება. მაინტერესებს, შეიძლება თუ არა, რომ არ მომიწიოს დამატებითი სემესტრის გავლა“.

სოციალურ და პოლიტიკურ მეცნიერებათა ფაკულტეტის დეკანის თამარ დოლბაიას ინფორმაციით, ადმინისტრაციამ აღნიშნული პრობლემის მოსაგვარებლად კონკრეტული ქმედებები უკვე განახორციელა.

„სოციალურ და პოლიტიკურ მეცნიერებათა ფაკულტეტზე არის საგნები, რომლებიც მხოლოდ გაზაფხულის, შემოდგომის ან ორივე სემესტრში იხსნება. ეს პრობლემა, რომელიც თქვენ წამოჭერით, სხვა სტუდენტებსაც აქვთ. ამიტომ, სასწავლო პროგრამის ხელმძღვანელებს უკვე შევუთანხმდი და ყოველ სემესტრში სულ ცოტა 120-125 კრედიტი დაემატება და სტუდენტები შეძლებენ საგნებზე დარეგისტრირებას, აღარ მოუწევთ დამატებითი სემესტრის აღება. რაც შეეხება კონკრეტულად თქვენს საგანს, თუ რამდენად შესაძლებელია ორივე სემესტრში იყოს, საჭიროა კონსულტაციის გავლა ხარისხის სამსახურთან და პროგრამის ხელმძღვანელთან. ასევე, სპეციალისტებს უკვე მივეცი დავალება, ამოკრიბონ სავალდებულო საგნები, რისი გავლაც მეშვიდე-მერვე სემესტრელებს სჭირდებათ, რომ სტუდენტებმა დამატებით სემესტრში ზედმეტად თანხა არ გადაიხადონ“, - აღნიშნა თამარ დოლბაიამ.

თსუ-ის რექტორმა სოციალურ და პოლიტიკურ მეცნიერებათა ფაკულტეტზე არსებული პრობლემების მიზეზები განმარტა. მისი განცხადებით, ამის ერთ-ერთი მთავარი საფუძველი, საკმაოდ დიდი ხნის განმავლობაში, დეკანის თანამდებობაზე მოვალეობის შემსრულებლების ყოფნა გახლდათ.

„სოციალურ და პოლიტიკურ მეცნიერებათა ფაკულტეტზე წლების განმავლობაში დაგროვდა პრობლემები. დიდი ნაწილი დაკავშირებულია იმ ფაქტთან, რომ ფაკულტეტს არ ყავდა დეკანი. 6 თვის ვადით მოვალეობის შემსრულებლები ინიშნებოდნენ, რაც ძალიან მცირე დროა ვითარების გასაუმჯობესებლად. რამდენიმე თვეა ფაკულტეტმა აირჩია პროფესორი თამარ დოლბაია დეკანის თანამდებობაზე. მას ჩვენი მხრიდან სრული მხარდაჭერა აქვს ფაკულტეტზე არსებული მდგომარეობის წესრიგში მოსაყვანად.

აუცილებელია, რომ სტუდენტებმა შეგვატყობინონ პრობლემების შესახებ. პროფესორთა გაცდენას რაც შეეხება, უნივერსიტეტში არსებობს ეთიკის კომისია, რომელიც მსგავს საკითხებს წყვეტს. ამა თუ იმ დარღვევის შესახებ კომისია იმსჯელებს და მისი დასკვნის შესაბამის სადამსჯელო ღონისძიებებს გავატარებთ“, - განაცხადა თსუ-ის რექტორმა ვლადიმერ პაპავამ.

თსუ-ის ინფრასტრუქტურის პრობლემა

სტუდენტებმა თსუ-ის შენობების, აუდიტორიების გარემონტების პრობლემაც წამოჭრეს. სოციალურ და პოლიტიკურ მეცნიერებათა ფაკულტეტის საერთაშორისო ურთიერთობების სტუდენტი ირაკლი გაბიტაშვილი თბილისის სახელმწიფო უნივერსიტეტში დაგეგმილი ინფრასტრუქტურული პროექტებით დაინტერესდა: „აღსანიშნავია II კორპუსის 48 აუდიტორიის პრობლემა. განათლება ასოცირდება სინათლესთან, თუმცა როდესაც ამ აუდიტორიაში შედიხარ, საპირისპირო ვითარებაა. გასარემონტებელია, საკმაოდ ცუდ მდგომარეობაშია – სიბნელეა, ფანჯარა არ იღება... ვფიქრობ, გარემოს დიდი მნიშვნელობა აქვს. ინგლისურის ლექციები გვიტარდება აუდიტორიაში, სადაც, თუ მთელი ჯგუფი ესწრება, ორი სტუდენტი ფეხზე რჩება. ვფიქრობ, თბილისის სახელმწიფო უნივერსიტეტი ქვეყნის სახელმწიფოებრიობის მაჩვენებელიცაა, ამიტომ მაქვს კითხვა - ხომ არ იგეგმება ინფრასტრუქტურული პროექტები ამ მდგომარეობის გამოსასწორებლად?“.

სარემონტო სამუშაოების განხორციელების სირთულეებზე თსუ-ის რექტორმა ისაუბრა. საკითხის განხილვისას ვლადიმერ პაპავამ განმარტა, რომ სახელმწიფო დაფინანსების გარეშე უნივერსიტეტის ბიუჯეტი ფართომასშტაბიან ინფრასტრუქტურულ პროექტებს ვერ გაწვდება, თუმცა სხვადასხვა პროექტისა თუ ხელშეკრულების საფუძველზე გარკვეული სარემონტო სამუშაოები ხორციელდება. მაგალითად, თსუ-ში სან-დიეგოს უნივერსიტეტის შემოსვლის შემდეგ პარტნიორმა უმაღლესმა სასწავლებელმა II და XI კორპუსებში ლაბორატორიები, აუდიტორიები, ბიბლიოთეკა გაარემონტა.„მივესალმები თქვენს დამოკიდებულებას უნივერსიტეტის მიმართ. ვფიქრობ, რომ უნივერსიტეტში არსებულ მდგომარეობაზე პასუხისმგებლობა სახელმწიფომაც უნდა აიღოს. დღეს ერთადერთი შემოსავალი სტუდენტის მიერ გადახდილი სწავლის საფასურია. გამოსავალი სახელმწიფო დაფინანსების მიღებაა. მინდა გითხრათ, რომ ამ მხრივ უნიკალური ქვეყანა ვართ, ევროპულ ქვეყნებში უმაღლესი სასწავლებლების დაფინანსების დაახლოებით 40 პროცენტს სახელმწიფოს მიერ გამოყოფილი თანხა შეადგენს. ჩვენთან კი გახლავთ – ნული. ამ საკითხზე ვმუშაობთ განათლებისა და მეცნიერების სამინისტროსთან, გვპირდებიან დაფინანსების სქემის შემუშავებას, მაგრამ ჯერჯერობით კონკრეტული არაფერია.

განათლებისა და მეცნიერების სამინისტრო აფინანსებს ინფრასტრუქტურულ პროექტებს. ჩვენ მოვახერხეთ და თსუ-ის III კორპუსის გასარემონტებლად თანხა მივიღეთ, რაც ეტაპობრივად განხორციელდება. ვაპირებთ, ასევე, მედიცინის ფაკულტეტის კორპუსის გარემონტებას, სადაც საკმაოდ სავალალო მდგომარეობაა.

ამჟამად, განათლებისა და მეცნიერების სამინისტროსთან მიმდინარეობს მოლაპარაკება, რომ მივიღოთ დაფინანსება II კორპუსის პერიმეტრის გასარემონტებლად. მთლიანი რემონტი ძვირი – 50 მილიონი ლარი ჯდება. ასეთი თანხის გამოყოფა უნივერსიტეტისთვის წარმოუდგენელია. არ მინდა გეგონოთ, რომ სტუდენტების მიერ გადახდილი თანხით არაფერს ვაკეთებთ. X კორპუსში გამოიცვალა ფანჯრები, იქაც საკმაოდ სავალალო მდგომარეობა იყო. II კოპრუსის 48 აუდიტორიის პრობლემაზე დიდი ხანია საუბრობენ და ვგეგმავთ მის გარემონტებას.

თსუ-ის ხელმძღვანელობა სტუდენტების ხედვას უნივერსიტეტის როლთან დაკავშირებით სრულიად იზიარებს და ეს გვაერთიანებს. გასულ წლებთან შედარებით, დღეს, განათლებაზე ბევრად მეტი რესურსი იხარჯება, მაგრამ იმდენი შენობაა წესრიგში მოსაყვანი, ბუნებრივია, ეს თანხები საკმარისი არ არის. მთავარია, რომ სტუდენტის მოტანილი ფული უნივერსიტეტის დაფინანსების მთავარი კომპონენტი არ იყოს. აუცილებელია საბიუჯეტო დაფინანსება. ჩვენ არ ვითხოვთ განსაკუთრებულ რამეს, ვითხოვთ იმას, რაც ევროკავშირის ქვეყნებშია“, - განაცხადა ვლადიმერ პაპავამ.

თსუ-ის რექტორმა, ასევე, ისაუბრა თბილისის სახელმწიფო უნივერსიტეტის სტუდენტური საერთო საცხოვრებლის შენობების მდგომარეობასა და გარემონტებასთან დაკავშირებული პრობლემების შესახებ.

უკმაყოფილება ემერიტუსი პროფესორების ლექციების გამო

იმ პროფესორებს, რომლებსაც თბილისის სახელმწიფო უნივერსიტეტისა და, ზოგადად, მეცნიერებაში დიდი დამსახურება აქვთ, ფაკულტეტის წარდგენითა და აკადემიური საბჭოს გადაწყვეტილებით, ემერიტუს პროფესორის სტატუსი ენიჭებათ. მათი კვალიფიკაციისა და ცოდნის საჭიროებიდან გამომდინარე, ისინი უნივერსიტეტში ლექციების წაკითხვას აგრძელებენ. თუმცა, როგორც იურიდიული ფაკულტეტის სტუდენტმა ირაკლი კუპრაძემ აღნიშნა, სტუდენტების ნაწილი უკმაყოფილოა.

„მინდა, იმ პრობლემურ საკითხს შევეხო, რომელიც წლებია არსებობს და რომლის გაჟღერებასაც ადმინისტრაცია უფრთხის. იურიდიულ ფაკულტეტზე ვისაუბრებ. იმ პროფესორებთან, რომლებსაც ემერიტუსის სტატუსი აქვთ (ასაკოვნები არიან და უნივერსიტეტის მიტოვება უჭირთ), სტუდენტებისთვის საგნის გავლა წამგებიანია, ვინაიდან აქვთ სწავლების ძველი მეთოდები, ნაკლები ენერგია და კონტაქტი სტუდენტებთან. შესაბამისად ასე ხდება - შემოთავაზებული 3-4 ლექტორიდან ადგილები რჩება მხოლოდ ემერიტუსის სტატუსის მქონე პედაგოგთან და სტუდენტთა ნაწილი იჩაგრება. იქნებ დავარეგულიროთ ეს საკითხი და ახალგაზრდა პროფესორებს მიეცეთ საშუალება - მათი ადგილი დაიკავონ“, - განაცხადა იურიდიული ფაკულტეტის IV კურსის სტუდენტმა ირაკლი კუპრაძემ.

აღნიშნულ მოსაზრებას იურიდიული ფაკულტეტის დეკანის მოადგილე თამარ ზარანდია გამოეხმაურა.

„სავალდებულო საგნის შემთხვევაში სტუდენტებს არჩევანის საშუალება აქვთ - ვთავაზობთ 4 ან 5 პროფესორს. ამ პროცესში სრულად ვარ ჩართული. ყოველთვის არის ადგილი ემერიტუსთან და სხვა პროფესორებთანაც. ჩვენ გვქონდა ასეთი შემთხვევა - ჯგუფი მცირერიცხოვნობის გამო დავხურეთ, შემდეგ კი მოვიდა სტუდენტების ნაწილი და აღდგენა გვთხოვა. ემერიტუსები კვალიფიციური და ღვაწლმოსილი პროფესორები არიან, მართლაც თავდაუზოგავად შრომობენ უნივერსიტეტისთვის. არ მინდა ვინმემ იფიქროს, რომ სტუდენტებს თავს ვახვევთ. ყოველთვის დგება პარალელური ჯგუფები, სადაც მათ დარეგისტრირება შეუძლიათ“, - განაცხადა თამარ ზარანდიამ.

თსუ-ის რექტორის რეკომენდაციით, იურიდიული ფაკულტეტის სტუდენტებსა და ადმინისტრაციის წარმომადგენლებს შორის ემერიტუს პროფესორებთან დაკავშირებით დიალოგი გაგრძელდება.

დასაქმების პრობლემა

თსუ-ის ხელმძღვანელობისა და სტუდენტების შეხვედრაზე ხარისხიანი განათლების მიღებისთვის აუცილებელი საკითხების გარდა, განათლების მიღების შემდეგ კურსდამთავრებულთა დასაქმებაზეც ისაუბრეს. პრიორიტეტულია თუ არა და რას აკეთებს სახელმწიფო კვალიფიციური ახალგაზრდა კადრების ათვისებისთვის - ამის შესახებ ჰუმანიტარულ მეცნიერებათა ფაკულტეტის კლასიკური ფილოლოგიის დოქტორანტმა ნანა ტოხვაძემ ისაუბრა: „მნიშვნელოვანი პრობლემაა, თუ რამდენად ვალდებულად თვლის სახელმწიფო უმაღლესი სასწავლებლები დააფინანსოს, მაგრამ, ასევე მნიშვნელოვანია - რა პასუხისმგებლობას იღებს იგი პროფესიონალი კადრების დასაქმების კუთხით. თბილისის სახელმწიფო უნივერსიტეტს ბევრი წარმატებული ახალგაზრდა ამთავრებს. იქნებ შესაძლებელია რაიმე თანამშრომლობის გზის გამონახვა და მათ დასაქმებაზე ზრუნვა“.

„ეს მნიშვნელოვანი პრობლემაა, რომელიც მხოლოდ ჩვენთან არ არის. ანალოგიური პრობლემა სხვა ქვეყნებშიც არსებობს. როდესაც დოქტორანტურაში სწავლობს სტუდენტი, გასაგებია, იგი სამეცნიერო ან აკადემიურ სფეროში გეგმავს მოღვაწეობის გაგრძელებას. თქვენი სპეციალობის მიმართულებით, კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტი ზრუნავს ახალგაზრდა მკვლევრების დასაქმებაზე. გარდა ამისა, თსუ-ში არსებობს პოსტდოქტორანტურის საფეხური. ჩვენ ახლაც გვაქვს ხელშეკრულება გაფორმებული რამდენიმე კურსდამთავრებულთან. ვმუშაობთ იმ მიმართულებით, რომ არ დავკარგოთ კვალიფიციური კადრები“, - უპასუხა ჰუმანიტარულ მეცნიერებათა ფაკულტეტის დეკანმა დარეჯან თვალთვაძემ.

პოსტდოქტორანტურის საფეხურზე მოსახვედრად კონკურსი ტარდება. შედეგად, 5 საუკეთესო ახალგაზრდა მკვლევარი 2 წლის განმავლობაში თბილისის სახელმწიფო უნივერსიტეტში სამეცნიერო მუშაობას გააგრძელებს. მათი საქმიანობა ანაზღაურებადია.

„მსოფლიოს უნივერსიტეტებში პოსტდოქტორანტურა დიდი ხანია არსებობს. საქართველოს საუნივერსიტეტო სივრცეში პირველად ჩვენ შემოვიღეთ, არც ერთ უმაღლეს სასწავლებელს ეს არ გააჩნია. ამჟამად, მთავრობა მუშაობს, რომ უმაღლესი განათლების შესახებ კანონში პოსტდოქტორანტურის ინსტიტუტის შესახებ ჩანაწერი შეიტანოს. შარშან მივიღეთ 4 პოსტდოქტორანტი, წელს კონკურსის გამოცხადებას 7 ადგილზე ვაპირებთ. ჩვენ ვერ ვიმსჯელებთ ქვეყნის მასშტაბით რა ხდება. ხოლო საუნივერსიტეტო რესურსის გათვალისწინებით საუკეთესო სტუდენტებს დოქტორანტურაში უფასოდ სწავლას ვთავაზობთ, სადოქტორო ნაშრომს საუკეთესოდ ვინც დაიცავს, მათ შეუძლიათ თსუ-ში პოსტდოქტორანტურის ფარგლებში კიდევ 2 წელი კვლევა გააგრძელონ“, - განაცხადა თსუ-ის რექტორმა ვლადიმერ პაპავამ.

ვრცლად

გვესაუბრება თსუ-ის რექტორი ლადო პაპავა

თსუ-ში აუთვისებელი ადგილები პრაქტიკულად
არ დარჩა

- საკმაოდ რთული წელი გამოვიარეთ. არც მისაღები ეროვნული გამოცდები იყო მარტივი. ჩვენს უნივერსიტეტში აუთვისებელი ადგილები დაგვრჩა მხოლოდ გამოცხადებული ვაკანსიის 3,4%, რაც ძალიან დაბალი მაჩვენებელია. უნივერსიტეტი პრაქტიკულად სრულად შევსებულია, რაც შეეხება დარჩენილ ვაკანსიებს, ეს მოსალოდნელიც იყო. შეუვსებელი დაგვრჩა, მაგალითად, პროგრამა - ქართული ენის შესწავლა აფხაზებისთვის. უნივერსიტეტი ყოველთვის გამოაცხადებს ამ პროგრამას, მაგრამ აქ ყოველთვის დაგვრჩება აუთვისებელი ადგილები, ვიდრე არ გადაწყდება ქართულ-აფხაზური ურთიერთობების საკითხი.
სან დიეგოს უნივერსიტეტში სწავლა 28 სექტემბერს დაიწყება

- ამავდროულად, ვამაყობთ, რომ ყველაზე მეტი მაღალრეიტინგული სტუდენტი ჩვენ გვყავს. მათ შორის ძალიან ბევრმა გაბედა და ჩააბარა ქართულ-ამერიკულ პროგრამაზე სან-დიეგოს უნივერსიტეტის საინჟინრო სკოლაში. ჩვენ მათთვის არ შეგვითავაზებია დამატებითი რაიმე მატერიალური წახალისება, რაც ზოგიერთ უნივერსიტეტს გაცხადებული ჰქონდა სტიპენდიების დაწესების სახით (ჩვენ ამის შესაძლებლობა ამ ეტაპზე არ გაგვაჩნდა), მაგრამ ახალგაზრდების უმრავლესობამ მაინც ჩვენი უნივერსიტეტი აირჩია. ამჟამად სან დიეგოს უნივერსიტეტისათვის გამოყოფილ აუდიტორიებში სარემონტო სამუშაოები მიმდინარეობს. იქ სწავლა 28 სექტემბერს დაიწყება და ამ დროისთვის ყველაფერი უნდა იყოს წესრიგში.
გადაწყვეტილების სისწორე ახალმა ვითარებამაც დაადასტურა

- აღსანიშნავია ისიც, რომ ჩვენ წელს პირველად გვქონდა მიღება ახლად შექმნილ ფსიქოლოგიისა და განათლების მეცნიერებათა ფაკულტეტზე. ის, რომ ჩვენი გადაწყვეტილება ფაკულტეტის შექმნის თაობაზე იყო სწორი, გამოჩნდა იმ მხრივაც, რომ უნივერსიტეტში ყველაზე მოთხოვნად ფაკულტეტად ხუთეულში ფსიქოლოგია გამოიკვეთა. ესეც დასტურია იმისა, რომ არა მხოლოდ ჩვენი უნივერსიტეტის ხელმძღვანელობისა და აკადემიური პერსონალის (ვგულისხმობ ჩვენს კოლეგებს - ფსიქოლოგებს), არამედ თავად ახალგაზრდების არჩევანი სწორი ყოფილა, რათა საქართველოში გაიზარდოს ფსიქოლოგების ახალი თაობა.

ვრცლად